ԵՐԵՎԱՆ, 19 ապրիլի — Sputnik. «Բարգավաճ Հայաստան» կուսակցության առաջնորդ, «Արարատցեմենտի» սեփականատեր Գագիկ Ծառուկյանն այսօր ԱԺ ամբիոնից իր գործընկերներին կոչ արեց չանձնավորել ու մարդկանց չվիրավորել ցեմենտի շուկայում ստեղծված իրավիճակը քննարկելու ժամանակ։
Գագիկ Ծառուկյանը, մեղմ ասած, այնքան էլ հաճախ չի հայտնվում ԱԺ ամբիոնի մոտ, այնպես որ նրա ելույթն արդեն իսկ ուշագրավ էր հենց այդ առումով։ Բացի այդ, գործարարը փորձեց ասել այն ամենը, ինչ կուտակվել էր։ Նույնիսկ լրացուցիչ ժամանակ խնդրեց, քանի որ շատ բան ուներ ասելու։
Ելույթը սկսեց կլինկերից` ցեմենտի հումքից։ Գործարանի սեփականատերն ուզում է, որ կլինկերի ներմուծման համար էլ լրացուցիչ տուրք գանձվի, ինչին դեմ են կառավարությունն ու ԱԺ տնտեսական հարցերի հանձնաժողովը։ Ծառուկյանին լրացուցիչ տուրքերը պետք են, որպեսզի իր գործարանի արտադրած կլինկերը կարողանա մրցակցել ներկրվողի հետ։
«Այսօր մեր հիմնական խնդիրը չէ, որ անպայման կլինկերի վրա էլ տուրք դրվի։ Մենք ուզում ենք ասել, ձեր ցավը տանեմ, որոշել եք, պատասխանատուն «Իմ քայլն» է, հայտարարեք, որ դուք գտնում եք, որ դա ավելի էժան կլինի, շահութաբեր կլինի, մենք համաձայն ենք, հիմա ես կլինկեր կբերեմ, թե ցեմենտ կարտադրեմ, դա ինչ խնդիր է, մենք ոչ մեկին չենք ուզում ոչ նեղացնենք, ոչ վիրավորենք։ Ես երեկ իմ խմբակցության հետ հանդիպել եմ, բոլորին զգուշացրել եմ, որ որևիցե անձնական վիրավորանք չլինի, դա պատիվ չի բերում, դա թույլ մարդը կարա մենակ անի։ Մենք միշտ դա պահել ենք, բայց եթե փորձում են վիրավորել, տասնապատիկ կստանան՝ դոկումենտալ, փաստացի», – փոքր–ինչ սրտնեղած տոնայնությամբ ասաց Ծառուկյանը։
Նրա խոսքով` փոխանակ քննարկեն և ցեմենտի խնդրի վերաբերյալ ինչ–որ լուծման գան, իրեն մեղադրում են ցեմենտի գործարանը կոպեկներով ձեռք բերելու համար։
«էսօր մեր նպատակը հեղափոխությունից հետո մի լավ բան անելն է, փոխանակ հարցը էսօր քննարկվի, ասում է՝ ցեմենտի գործարանը քանիսով է ձեռք բերվել: Ձեր ցավը տանեմ, եթե 200 հազար դոլարով է ձեռք բերվել, ես նվեր տամ հայտարարողին, թող նայի, բայց եթե այդքանով ձեռք չի բերվել, մյուս օրը ինքը դրա համար պետք է պատասխան տա, թե ինչի համար է այդպիսի հայտարարություն անում», – հայտարարեց Ծառուկյանը։
Կուսակցության առաջնորդն «Իմ քայլին» մեղադրեց անգործության մեջ։ Մասնավորապես, նրա խոսքով, հիմա ցանքի շրջան է սկսվում, գյուղացիներին սերմեր են պետք, պարարտանյութ, վառելիք։ Ըստ նրա` իշխող խմբակցությունը մատը մատին չի խփել, որպեսզի օգնի գյուղացուն ինչ–որ կերպ լուծել բոլոր այդ հարցերը։
«Ես լավ էլ խոսում եմ գյուղատնտեսությունից, իսկ դուք ի՞նչ եք անում: Վարուցանքը սկսել է, բայց ժողովուրդը ոչ դեղ ունի, ոչ սերմ: Չեմ ուզում բողոքավորի տեսք ընդունել, բայց ժողովուրդն ինձ ասում է, որ Ջրային կոմիտեն իրենց հետ պայմանագիր է կապել և փող է ուզում, բայց եթե ջուրը չտան և բերքն ամռանը չորանա, իրենք պատասխանատու չեն», – ասաց նա։
Վերադառնալով ցեմենտի թեմային, գործարարը նշեց, որ արտադրության ինքնարժեքը շատ բարձր է, ի հեճուկս «որոշ ընկերների» հայտարարությունների։ Նրա խոսքով` ոչ ոք չի հարցնում, որքան գազ ու էլեկտրականություն է սպառվում մեկ տոննա ցեմենտի արտադրության համար, թե գործարանը տարվա ընթացքում քանի ամիս է աշխատում, իսկ որքան կանգնած լինում։
Ծառուկյանը խոսեց կանոնակարգով սահմանված 10 րոպեն և ամբիոնը լքեց միայն փոխխոսնակ Ալեն Սիմոնյանի երկար հորդորներից հետո։
