ԵՐԵՎԱՆ, 12 ապրիլի – Sputnik. ՀՀ կառավարությունը մտածում է «բնակարան ներգաղթյալների համար» ծրագրի մասին։ Ինչպես հայտնում է ՀՀ վարչապետի մամուլի ծառայությունը, Նիկոլ Փաշինյանն այս մասին ասել է Ստրասբուրգում հայ համայնքի հետ հանդիպման ժամանակ։
«Վերջերս Վիեննայի հայության հետ հանդիպման ընթացքում գաղափար առաջացավ, որ, ինչպես մենք ունենք բնակարան երիտասարդ ընտանիքների համար ծրագիր, բնակարան երիտասարդ մասնագետների համար ծրագիր, հիպոթեկային ծրագրեր, ստեղծվի բնակարան ներգաղթյալների համար ծրագիր, որի իմաստը որոշակի պայմաններով հիպոթեկային վարկեր առաջարկելն է` առավել մատչելի տոկոսներով»,– ասել է նա:
Փաշինյանը նշել է, որ կառավարությունն ու Կենտրոնական բանկը համատեղ աշխատում ենք այդ ծրագրի իրագործման վրա:
ՀՀ վարչապետն աշխատանքային այցով Ստրասբուրգում էր ապրիլի 10-ին և 11-ին։
