ԵՐԵՎԱՆ, 9 ապրիլի — Sputnik. RT–ի գլխավոր խմբագիր Մարգարիտա Սիմոնյանը նվեր է ստացել հին գիրք` կոմս Լև Տոլստոյի հայերեն թարգմանված ստեղծագործությունների ժողովածուն։ Սիմոնյանը նվերի լուսանկարը հրապարակել է Facebook–ում։
Նրան նման անսովոր նվեր է արել Քրիստինա Պոտուպչիկը: Ինչպես գրում է Սիմոնյանը, այն պատկանել է Ղրիմից արտաքսված ընտանիքի։
«Իմ տատիկն ու պապիկը նույնպես արտաքսվել են Ղրիմից։ Պապիկս մահացել է ծննդյանս օրը, երբ դարձել եմ 16 տարեկան։ Քրիստինա, խոսքեր չկան», – գրել է Սիմոնյանը։
Շապիկի վրայի գրությունը վկայում է, որ գիրքը լույս է տեսել 1905թ–ին Մայր աթոռ սուրբ Էջմիածնի հրատարակչությունում։ Տոլստոյի ժողովածուն հայերեն է թարգմանել Ե. Մուրադյանը։
Մարգարիտա Սիմոնյանի տատիկի ու պապիկի ընտանիքը բռնաճնշումների է ենթարկվել 1944թ–ին։
Սիմոնյանը պատմել է, թե ինչպես են իր պարտիզան տատիկին 14–ամյա վիրավոր, պարտիզան դստեր հետ Ղրիմի 10 000 մյուս հայերի պես նստեցրել վագոններ ու աքսորել։
«Պապիկս` Սարգիս Սիմոնյանը, այդ ժամանակ կռվել է, նրա քույրն ու մայրը պարտիզան են եղել։ Նախապապս վիրավորվել է, պառկել է Սիմֆերեպոլի հոսպիտալում։ Արդեն ապաքինվելիս է եղել։ Գիշերը խնդրել է թույլ տալ իրեն գնալ տուն։ Լավ է, որ տունը հիվանդանոցին մոտ է եղել։ Կեսգիշերին մոտեցել են տանը և հայտարարել, որ դուք 20 րոպե ունեք հավաքվելու համար, ձեզ վերաբնակեցնում եք, քանի որ այս պահից դուք թշնամի եք։ Իսկ դուք` պարոն զինծառայող, մնում եք։ Եվ վիրավոր նախապապս նայել է, թե ինչպես են իր կնոջն ու երեք երեխաներին, որոնցից ավագը տատիկս էր` Մայա Ալոևան, խցկել են վագոնները և ուղարկել Ուրալ», – ավելի վաղ պատմել էր Սիմոնյանը։
Սիմոնյանն ամեն տարի գրառում է անում իր ընտանիքի մասին և կոչ անում օգտատերերին միանալ #япомню (ես հիշում եմ) ակցիային։
