ԵՐԵՎԱՆ, 8 ապրիլի — Sputnik. «Սպայկա» ՍՊԸ-ի տնօրեն Դավիթ Ղազարյանի փաստաբանները նրա կալանքը գրավով փոխարինելու միջնորդություն են ներկայացրել դատարանին։ Այսօր այս մասին լրագրողների հետ զրույցում ասաց փաստաբան Կարեն Սարդարյանը:
«Գրավի միջնորդությունը ներկայացվել է, սակայն չափը չի նշվել: Դատարանն այն գումարը, որը խելամիտ կհամարի, կարող է կիրառել»,- ասաց Սարդարյանը։
Անդրադառնալով կալանքի որոշման հիմքին` փաստաբանն ասաց. «Կալանավորման համար հիմք է հանդիսանում այն, որ Ղազարյանը կարող էր ազդեցություն ունենալ մարդկանց վրա իր օգտին ցուցմունք տալու առումով»։
Փաստաբանը նաև հայտնեց, որ Ղազարյանը դեռ ցուցմունք չի տվել, թեև պատրաստ է կատարել օրենքով նախատեսված բոլոր պարտավորությունները։ Ինչ վերաբերում է առաջադրված մեղադրանքին, Սարդարյանի խոսքով, դրա հիմքում միայն մեկ փորձագիտական եզրակացություն է։ Ղազարյանի դեմ ցուցմունք տվող չի եղել։
«Երեք օրվա ընթացքում եզրակացություն է տրվել, որ իրականացվել է հաշվապահական փորձաքննություն, ու որոշվել է հարկերի չափը: Այդ կարճ ժամանակահատվածում որոշվել է 7 մլրդ դրամ հարկ՝ առանց հարկատուին մասնակից դարձնելու»,- ասաց Կարեն Սարդարյանը:
Հիշեցնենք, այսօր Երևանի Կենտրոն և Նորք-Մարաշ վարչական համայնքների ընդհանուր իրավասության դատարանը որոշում կայացրեց բավարարել ՊԵԿ-ի միջնորդությունը` Դավիթ Ղազարյանի նկատմամբ 2 ամիս տևողությամբ նախաքննական կալանք կիրառելու մասին։
Դատական նիստին զուգահեռ դատարանի շենքի հարակից տարածքում բողոքի ակցիա են իրականացնում «Սպայկայի» աշխատակիցները։ Նրանք այս պահին դատարանի մոտից շարժվում են դեպի Հանրապետության հրապարակ` կառավարության շենքի մոտ`վարչապետ Նիկոլ Փաշինյանի հետ հանդիպում պահանջելու։
Նշենք, որ ըստ ՊԵԿ քննչական մարմնի առաջադրած մեղադրանքի` 01.01.2015-11.01.2016թթ. ընթացքում «Սպայկա» ընկերությունը թաքցրել է ՀՀ ներկրված ապրանքների դիմաց հարկային պարտավորությունները` կեղծելով «Գրինպրոդուկտ» ՍՊ ընկերության անվամբ մաքսային մարմիններին ներկայացված հարկի, տուրքի և այլ պարտադիր վճարների հաշվարկի հիմք հանդիսացող տեղեկությունները։
Ըստ ՊԵԿ–ի` «Սպայկան» պետական բյուջե չի վճարել 7 036 666 312 ՀՀ դրամ մաքսատուրք և հարկ` պետությանը պատճառելով ավելի քան 7 մլրդ դրամի վնաս։
«Սպայկայի» տնօրենի պարզաբանմամբ` նշված 7 մլրդ դրամից 5–ը ԱԱՀ-ն է, որը ժամանակավոր ներմուծման ռեժիմի պարագայում ենթակա է վերադարձման, իսկ մնացած 2 մլրդ–ի պարտավորությունն իրենց չի կարող վերագրվել, քանի որ իրենց ընկերությունը միայն բեռնափոխադրում է իրականացրել, բեռը պատկանել է «Գրինպրոդուկտ» ՍՊԸ–ին։
