ԵՐԵՎԱՆ, 29 մարտի – Sputnik. ԵԱՀԿ Մինսկի խմբի համանախագահ Ստեփան Վիսկոնտին Փաշինյան-Ալիև հանդիպումը բնութագրել է երկար, հագեցած, արդյունավետ։ Այս մասին հայտնում է Tert.am-ը։
«Հույս ունենք, որ այս ամենը շարունակություն կունենա»,-ասել է նա:
Հարցին՝ ե՞րբ կլինի հաջորդ հանդիպումը, նա պատասխանել է. «Կիմանաք, երբ նախագահն ու վարչապետն ասեն դրա մասին»:
Այնուհետև «Բրիստոլ» հյուրանոցը լքել է ԵԱՀԿ գործող նախագահի անձնական ներկայացուցիչ Անջեյ Կասպրչիկը, որը հրաժարվել է պատասխանել լրագրողների հարցերին։
Հիշեցնենք, որ Ադրբեջանի նախագահ Իլհամ Ալիևի և ՀՀ վարչապետ Նիկոլ Փաշինյանի հանդիպումը Վիեննայում մեկնարկել էր երևանյան ժամանակով 14:00-ին՝ Ադրբեջանի և Հայաստանի ԱԳ նախարարների և Մինսկի խմբի համանախագահների մասնակցությամբ, այնուհետև շարունակվել է առանձին: Երեք ժամ անց նրանց կրկին միացել էին արտգործնախարարներն ու համանախագահները:
