ԵՐԵՎԱՆ, 28 մարտի— Sputnik. Չեխական կողմը Նարեկ Սարգսյանի արտահանձնման հարցով Հայաստանի իրավական համակարգի համար խնդիրներ չի հարուցում։ Sputnik Արմենիայի հետ զրույցում, անդրադառնալով այդ մասին մամուլի հրապարակումներին, ասաց ՀՀ գլխավոր դատախազ Արթուր Դավթյանը։
«Մեր կողմից անհրաժեշտ փաստաթղթերն ուղարկվել են մեր գործընկերներին, ակնկալում ենք առաջիկայում նրանց պատասխանը։ Այս պահին կոնվենցիոնալ կարգավորումներից դուրս այլ խնդիրների չենք հանդիպել»,- ասաց Դավթյանը։
Հիշեցնենք` միջազգային հետախուզման մեջ գտնվող Նարեկ Սարգսյանը հայտնաբերվել և ձերբակալվել էր 2018թ.–ի դեկտեմբերի 6-ին, Պրահայում։ Հայտնաբերման պահին նա ներկայացրել է Գվատեմալայի քաղաքացու կեղծ անձնագիր՝ ոմն Ֆրանկլին Գոնսալեսի անհատական տվյալներով:
Նարեկ Սարգսյանի հայտնաբերման մասին տեղեկությունը փոխանցվել է ՀՀ գլխավոր դատախազությանը՝ նրա Հայաստան տեղափոխման գործընթացը կազմակերպելու նպատակով: Այդ պահից սկսած Գլխավոր դատախազությունը հայտարարում է, որ ներկայացրել է անհրաժեշտ փաստաթղթերն ու սպասում է չեխական կողմի պատասխանին։
Անդրադառնալով այլ քրեական գործերով արտասահմանում գտնվող մեղադրյալներին, մասնավորապես Սերժ Սարգսյանի եղբորը` Ալեքսանդր Սարգսյանին ու Սամվել Մայրապետյանին, Արթուր Դավթյանը չթաքցրեց, որ դա այնքան էլ դատախազության սրտով չէ։
Նրա խոսքով՝ վարույթ իրականացնող մարմնի համար ցանկալի է, որ վարույթի բոլոր մասնակիցները գտնվեն իրենց տրամադրության տակ։ Բայց այս պայմաններում էլ, եթե ՀՀ գլխավոր դատախազության միջամտության անհրաժեշտություն առաջանա, Արթուր Դավթյանը խոստանում է, որ այն «վայրկյան չի ուշանա»։
ՀՀ երրորդ նախագահ Սերժ Սարգսյանի եղբայրը` Ալեքսանդր Սարգսյանը, Հայաստանից մեկնել է քննչական մարմնի թույլտվությամբ։ Այս մասին տեղեկություններն օրերս հաստատել էր ԱԱԾ տնօրեն Արթուր Վանեցյանը։ Թե որ երկրում է գտնվում Սարգսյանը, պաշտոնապես չի հայտարարվում։ Լրատվամիջոցներում տարածված տեղեկության համաձայն` նա Իսպանիայում է։
Սարգսյանը մեղադրվում է առանձնապես խոշոր չափերի խարդախության մեջ։
Արտերկրում է գտնվում նաև մեղադրյալի կարգավիճակ ունեցող գործարար Սամվել Մայրապետյանը։ Նա բուժման կուրս է անցնում Գերմանիայի Դաշնությունում։
Մայրապետյանը մեղադրվում է կաշառք ստանալուն օժանդակելու մեջ։
