ԵՐԵՎԱՆ, 27 մարտի — Sputnik. Փոխանակման կետերը և գրավատները վտանգավոր են Հայաստանի ֆինանսական հատվածի համար։ Այսօր ԱԺ–ում այս մասին ասաց փոխվարչապետ Մհեր Գրիգորյանը։
«Այո, ես անձամբ հանդիպել եմ փոխանակման կետերի և գրավատների ներկայացուցիչների հետ, բավականին երկար քննարկել ենք ու հանգել ենք հետևյալ մտքին, այո, պետք է չէ համեմատել գրավատները կամ փոխանակման կետերը այլ ֆինանսական կառույցների հետ, որովհետև այլ ֆինանսական կառույցները, թե վարկային կազմակերպությունները, թե բանկերը գործում են բացարձակ այլ կարգավորման դաշտում և ունեն բազմաթիվ սահմանափակումներ, իսկ պետությունն ունի գործիքակազմ, որպեսզի գործունեությունը կարգավորվի», – ասաց Գրիգորյանը։
Նրա խոսքով` բնականաբար վարչարարության ծախսը կամ ինքնարժեքը, բնականաբար, պետք է կոմպենսացվի տուրքի միջոցով։
«Այո, նաև 60 անգամ շատ տուրքի, քանի որ այսօրվա տուրքը, որը տարածվում է տվյալ կառույցների վրա, ուղղակի ծիծաղելի է և ադեկվատ չէ այն խնդրին, որն իրենք կարող են առաջացնել»,- ասաց նա։
Նա կարծում է, որ առաջարկվող տուրքի չափը կազմում է այդ կառույցների եկամտի 20-30 տոկոսը, ուստի առաջարկը լիովին տրամաբանական և հիմնավորված։
Գրիգորյանը նշեց, որ գրավատների և փոխանակման կետերի ղեկավարների հետ երկխոսությունն անիմաստ կլինի, եթե նրանք շարունակեն պնդել ներկա պայմանները, իսկ ԲՀԿ պատգամավոր Տիգրան Ուրիխանյանը հայտնեց, որ նրանք պատրաստվում են երկուշաբթի բողոքի ակցիա անցկացնել կառավարության շենքի դիմաց։
Ի պատասխան Գրիգորյանը հայտարարեց, որ արդեն եղել է նման ակցիաների ականատես, և խորհուրդ տվեց տրամադրվել երկխոսության, ոչ թե պահանջել ոչինչ չփոխել, քանի որ դա անհնար է։
«Պետական տուրքի մասին» ՀՀ օրենքում փոփոխություններ և լրացումներ կատարելու մասին» նախագծով առաջարկվում է գրավատների ու արժույթի փոխանակման կետերի համար 60 անգամ ավելացնել պետտուրքերը։
Նախագծով առաջարկվում է վարկային կազմակերպությունների համար գործող 500 հազար դրամի փոխարեն սահմանել տարեկան 1 միլիոն դրամ տուրք, վճարահաշվարկային համակարգերի համար` 250 հազարի փոխարեն 1 միլիոն դրամ, վարկային բյուրոների համար` 500 հազարի փոխարեն 1 միլիոն դրամ, բանկերի համար` 3 միլիոնի փոխարեն 7 մլն դրամ, գրավատների համար` 100 հազարի փոխարեն 1 միլիոն դրամ, արժույթի փոխանակման կետերի համար` 50 հազարի փոխարեն 3 միլիոն դրամ, արժույթային դիլերների համար` 100 հազարի փոխարեն 3 միլիոն դրամ։
