ԵՐԵՎԱՆ, 20 մարտի — Sputnik. Հայաստանի ատոմակայանի ջրամատակարարման հարցը կլուծվի ստորգետնյա ջրերի հաշվին։ Այսօր լրագրողներին այս մասին ասաց ատոմակայանի տնօրենի խորհրդական Գերա Սևիկյանը «Հայաստանում ատոմային ոլորտի զարգացման հեռանկարները» կլոր սեղանի շրջանակում։
ԱԷԿ–ում ջրամատակարարման կարիք կա` գեներատորների տուրբինները սառեցնելու համար։ Սևջուր գետի (Արաքսի վտակը) ծանրաբեռնվածությունը չավելացնելու համար կայանը մի քանի արտեզյան հորեր կփորի իր տարածքում։
«Մենք արդեն հորատել ենք երեք ջրհոր, նախատեսվում է հորատել ևս տասը։ Դա ամբողջությամբ կբավարարի մեր պահանջմունքները», – ասաց Սևիկյանը։
Նշենք, որ այդ տարածքում շարունակվում են անօրինական ջրային տնտեսությունների գործունեության հետևանքով առաջացած ջրի գերծախսի ստուգումները։
Սառեցման համար ավելի քիչ ջուր վերցնելու համար կայանն օգտագործում է ոչ թե երկու, այլ սառեցման երեք աշտարակ (ընդամենը չորսն են)։ Դրանց արդյունավետությունը կբարձրացվի ռուսական վարկի շրջանակում վերանորոգում իրականացնելուց հետո։
ԱԷԿ–ի ժամկետի երկարացման աշխատանքն իրականացվում է Ռուսաստանի կառավարությունից ստացած 270 միլիոն վարկային գծով ու 30 միլիոն դոլարի դրամաշնորհով։ Աշխատանքը նախատեսվում է ավարտել 2019 թվականի վերջին կամ 2020 թվականին, իսկ կայանը կկարողանա գործել մինչև 2027 թվական։
Հայաստանի ատոմակայանը գտնվում է Մեծամորում` Երևանից 28 կմ հեռավորության վրա։ Մեր ատոմակայանը միակն է տարածաշրջանում։
