ԵՐԵՎԱՆ, 20 մարտի – Sputnik. Հայկական ատոմային էլեկտրակայանի ռեակտորը հունիսի 1–ին կկանգնեցվի վերանորոգման աշխատանքներ կատարելու համար։ Այս մասին այսօր լրագրողներին ասաց «Հայկական ատոմակայան» ՓԲԸ–ի գլխավոր տնօրենի տեղակալ Գերա Սևիկյանը։
«Նախատեսվում է, որ այս տարի ռեակտորը 110 օրով կկանգնեցվի վերանորոգում անցկացնելու համար։ Առաջին տուրբինը կկանգնեցվի ապրիլի 15–ին, իսկ հունիսի 1–ից կկանգնեցվի ռեակտորն ու մյուս տուրբինը։ Ռեակտորը գործարկելուց հետո կմիացվի առաջին տուրբինը, կայանն այդ ռեժիմով կաշխատի մինչև երկրորդ տուրբինի արդիականացումը», – ասաց Սևիկյանը «Հայաստանում ատոմային ոլորտի զարգացման հեռանկարները» քննարկման շրջանակում։ Նրա խոսքով` նախատեսվում է, որ արդեն նոյեմբերին երկու տուրբիններն էլ կվերագործարկվեն։
Սևիկյանը հայտնեց նաև, որ այս պահին կայանը 390-400 մեգավատ էլեկտրաէներգիա է արտադրում։ «Հույս ունենք` եկող տարի արտադրությունը կհասնի 420 մեգավատի, իսկ 2021–ին` 450 մեգավատի», – ասաց Սևիկյանը։
Վերանորոգումից հետո կայանի արդյունավետությունը կբարձրանա։ Այսինքն` նույնքան վառելիք կօգտագործի, բայց ավելի շատ էլեկտրաէներգիա կտա։
ԱԷԿ–ի ժամկետի երկարացման աշխատանքն իրականացվում է Ռուսաստանի կառավարությունից ստացած 270 միլիոն վարկային գծով ու 30 միլիոն դոլարի դրամաշնորհով։ Աշխատանքը նախատեսվում է ավարտել 2019 թվականի վերջին կամ 2020 թվականին, իսկ կայանը կկարողանա գործել մինչև 2027 թվական։
Հայաստանի ատոմակայանը գտնվում է Մեծամորում, Երևանից 28 կմ հեռավորության վրա։ Մեր ատոմակայանը միակն է տարածաշրջանում։
