ԵՐԵՎԱՆ, 19 մարտի — Sputnik. Վարչապետ ընտրվելուց հետո ես ու գործող ԱԳ նախարարը հանդիպում ենք ունեցել ԱԳ նախկին նախարար Էդուարդ Նալբանդյանի հետ։ Այս մասին այսօր հրավիրած ասուլիսում հայտարարեց ՀՀ վարչապետ Նիկոլ Փաշինյանը` նշելով, որ իրենք խնդրել են, որ նա գա ու մեզ որոշակի տեղեկություններ հաղորդի։
«Ես, որպես նոր մարդ, բանակցային պատմության մասին հարցեր ունեմ բոլորին։ Այս դրվագի մասին կային որոշակի մեկնաբանություններ, հիմա դրանցից ո՞րն է ճիշտը։ Ես նաև համանախագահներին եմ որոշ հարցեր ուղղել։ Ու ինձ ասում էին` իրականում եղել է այսպես, ոչ թե այնպես։ Կան մարդիկ, որոնք ասում են` պետք չէ հասկանալ, եկել ես` լավ ես արել, նստիր, բանակցիր»,– ասաց Փաշինյանը։
Այդուհանդերձ, նա խոստովանեց` մինչև այսօր էլ ոչ բոլոր հարցերի պատասխաններն ունի։ Ստացած պատասխանները, վարչապետի խոսքով, նոր բազմաթիվ հարցեր են ծնել։
«Սա շատ բարդ գործընթաց է, ունի բազմաթիվ նրբություններ, և նա, ով ուզում է բանակցություններում մասնակցել, պիտի տիրապետի այդ պրոցեսի բոլոր նրբություններին։ Ալիևն արդեն տասնյակ տարիներ այդ պրոցեսի մեջ է, համանախագահներն իրենց աշխատանքն են անում։ Միակ մարդը, որ նոր է` ես եմ, ես պիտի ամեն ինչի տիրապետեմ։ Այո, շատ բան կա, որ պարզ չէ։ Ինչ է տեղի ունեցել Կազանում, ինչ է տեղի ունեցել Վիեննայում, ինչ է տեղի ունեցել Քի Վեսթում, այս հարցերի պատասխանները չկան։ Իսկ ես որպես նոր ներգրավված մարդ պարտավոր եմ այս հարցերի պատասխանները ստանալ»,– ասաց Փաշինյանը։
Առաջիկա հանդիպումը, Փաշինյանի համոզմամբ, արդեն նվիրված կլինի մի շարք պարզաբանումների պաշտոնական արձանագրմանը։
