ԵՐԵՒԱՆ, 19 մարտի – Sputnik. Իւրաքանչիւր հայաստանցի տղամարդու համար առաջին տիկինն իր կինն է, եւ իւրաքանչիւր հայաստանցի կնոջ համար առաջին պարոնն իր ամուսինն է, այսօր հրաւիրուած ասուլիսի ժամանակ ըսաւ ՀՀ վարչապետ Նիկոլ Փաշինեան` պատասխանելով լրագրողի այն հարցին, թէ ով է վերջապէս ՀՀ առաջին տիկինը:
«Ես, անկեղծ ըսեմ, չեմ հասկնար` սա ինչ քննարկում է` Հանրապետութեան առաջին տիկնոջ, Հանրապետութեան առաջին տղամարդու: Նման քննարկումներ կան: Ժամանակ մըն ալ քննարկում կար... Հանրապետութեան միակ տղամարդու քննարկումէն պրծանք, հիմա ալ Հանրապետութեան միակ կնոջ քննարկումը սկսած ենք: Սա ի՞նչ թեմա է ընդհանրապէս», - ըսաւ վարչապետը:
Փաշինեան մաղթեց, որ բոլոր անոնք, որոնք դեռ չեն գտած իրենց առաջին տիկիններն ու առաջին պարոնները, երջանիկ ընտանիքներ ձեւաւորեն:
Վարչապետը խօսեցաւ նաեւ իրեն սպասարկող ծառայողական ինքնաշարժին եւ ուղղաթիռին մասին:
«Այդ ուղղաթիռը, որ վարչապետի ծառայողական ուղղաթիռն է, ունի պարտադիր թռիչքային ժամեր: Ասիկա կը նշանակէ հետեւեալը. որպէսզի այդ տեխնիկան չվերածուի մետաղէ ջարդոնի, ունի պարտադիր թռիչքային ժամեր: Եւ եթէ նոյնիսկ վարչապետը չի նստիր այդ ուղղաթիռը, այն պարտաւոր է դատարկ բարձրանալ, երթալ Ստեփանակերտով, Վարդենիսով պտըտիլ, գալ», - ըսաւ ան:
Ինչ կը վերաբերի իրեն սպասարկող ծառայողական ինքնաշարժին, ապա վարչապետը նշեց, որ այն 2008 թուականին գնուած է ՀՀ երրորդ նախագահ Սերժ Սարգսեանին սպասարկելու համար, բայց վերջին 3 տարիներուն չէ օգտագործուած, քանի որ համարուած է ոչ պիտանի:
«Կայ նաեւ BMW մեքենան, որ գնուած է 2004 թուականին` Ռոպերթ Քոչարեանի համար: Հիմա հեծանիւով կ՛երթամ աշխատանքի, կ՛ըսեն` վայ հեծանիւով կ՛երթայ, ոտքով կ՛երթամ` կ՛ըսեն` պոպուլիստ է», - կէսկատակ–կէսլուրջ ըսաւ Փաշինեան:
