ԵՐԵՎԱՆ, 19 մարտի – Sputnik. Մեր տեղեկություններով՝ ոստիկանները բացահայտել են մարտի 8-ին Չարենցավանում տեղի ունեցած ավազակային հարձակումը:
Դանակով զինված տղամարդը մտել էր 61-ամյա մի կնոջ տուն, ձեռքերն ու ոտքերը կպչուն ժապավենով կապել, դանակով սպառնացել ու ոսկեղեն գողացել:
Ըստ տեղեկությունների՝ ավազակային հարձակումը ծրագրել և իրագործել են թալանված կնոջը դեպքի օրը հյուր եկած մտերմուհին և նրա ծանոթը: Իրավապահները հայտնաբերել են տուժողի համաքաղաքացիներ 35-ամյա կնոջն ու նրա ծանոթ 41-ամյա տղամարդուն: Նրանք ձերբակալվել են:
Մեր տեղեկություններով՝ տուժած կինը բազմիցս պարտքով գումարներ է տվել տարբեր անձանց, այդ թվում՝ իր մտերմուհուն, որը մարտի 8-ին եկել էր պարտքը վերադարձնելու:
Ճշտել ենք նաև, որ տուժողը ապրում է հոր հետ, որը հարձակման ժամանակ տանը չի եղել:
