Տոնական այս օրն ուզում ենք ներկայացնել այն նվաճումները, որոնք գրանցել են Հայաստանը ներկայացնող կանայք: Թույլ սեռի ներկայացուցիչները մեկ անգամ չէ, որ ապացուցել են իրենց հզորությունը տարբեր կարգի մրցումներում:
Օլիմպիական չեմպիոնի կոչումը նվաճած Հայաստանի 14 մարզիկների մեջ միայն Ֆաինա Մելնիկն էր գեղեցիկ սեռի ներկայացուցիչ: 1972 թվականին Մյունխենում Մելնիկն իրեն հավասարը չունեցավ սկավառականետորդների մրցումներում ու նվաճեց ոսկե մեդալը: Բացի այդ, հայտնի մարզուհին աշխարհի ռեկորդը 64 մետրից հասցրեց 70-ի` բացառիկ դառնալով այդ հաջողությամբ:
Հրաձգության պատմության մեջ հաստատուն տեղ են գտել Զինաիդա Սիմոնյանի ու Երջանիկ Ավետիսյանի անունները: Աշխարհի և Եվրոպայի հրաձգության առաջնություններում այս մարզուհիները մեկ անգամ չէ, որ կանգնել են պատվո պատվանդանի առաջին աստիճանին ու հենց նրանց հաղթանակների շնորհիվ է ծածանվել ԽՍՀՄ, իսկ ներքին մրցումներում էլ` Հայաստանի դրոշը:
![Թույլ սեռի ներկայացուցիչների հզորությունը, կամ հայուհիները սպորտում էլ են չեմպիոն Թույլ սեռի ներկայացուցիչների հզորությունը, կամ հայուհիները սպորտում էլ են չեմպիոն - Sputnik Արմենիա](https://cdn.am.sputniknews.ru/img/1763/12/17631252_0:0:2047:3032_600x0_80_0_0_4566fdfccaa0b61f5fe6d4f70b23e0c8.jpg)
Անկախ Հայաստանի մարզուհիներն էլ պակաս հաջողություններ չեն ունեցել: Նազիկ Ավդալյանի անունը երկար ժամանակ մարզասերների շուրթերին էր, երբ 2009 թվականին նա հռչակվեց որպես ծանրամարտի աշխարհի չեմպիոն: Առաջին հայացքից փխրուն, բայց իրականում «հզոր» Ավդալյանը հետագայում, ծանրագույն վնասվածքի արգելքը հաղթահարելով, 2016 թվականին նվաճեց Եվրոպայի չեմպիոնի կոչումը` ապացուցելով, թե ինչքան ուժեղ են կանայք:
![Թույլ սեռի ներկայացուցիչների հզորությունը, կամ հայուհիները սպորտում էլ են չեմպիոն Թույլ սեռի ներկայացուցիչների հզորությունը, կամ հայուհիները սպորտում էլ են չեմպիոն - Sputnik Արմենիա](https://cdn.am.sputniknews.ru/img/1168/41/11684192_0:0:1600:1065_600x0_80_0_0_a84a1789bf6422294b05b54f4017a0ee.jpg)
Սպորտային կարիերան չխանգարեց հայ աղջկան հաջողություններ ունենալ նաև անձնական կյանքում։ Սիրված կինն արդեն նաև երջանիկ մայր է և մեծացնում է իր որդուն։
Հռիփսիմե Խուրշուդյան, Մելինե Դալուզյան, Անուշ Գրիգորյան, Սոնա Պողոսյան... էլի ու էլի կարելի է թվարկել հայ մարզուհիների անուններ, որոնք հպարտության առիթ են պարգևել հայկական սպորտին և մարզասերներին:
![Թույլ սեռի ներկայացուցիչների հզորությունը, կամ հայուհիները սպորտում էլ են չեմպիոն Թույլ սեռի ներկայացուցիչների հզորությունը, կամ հայուհիները սպորտում էլ են չեմպիոն - Sputnik Արմենիա](https://cdn.am.sputniknews.ru/img/300/69/3006936_0:0:1600:1065_600x0_80_0_0_5a6b6019a7c19b49c08fc407ecd4bddd.jpg)
Հռիփսիմե Խուրշուդյանը 2016 թ.–ին, բարձր պահելով մեր երկիրը պատիվը, նվաճեց Ծանրամարտի Եվրոպայի չեմպիոնի տիտղոսը։ Նա նաև առանձին վարժություններում բազմակի մրցանակակիր է: Հռիփսիմեն արդեն ավարտել է մարզիկի կարիերան, բայց շարունակում է բարձունքներ նվաճել անձնական կյանքում։ Նա ընտանիք է կազմել, ունի մեկ որդի:
![Թույլ սեռի ներկայացուցիչների հզորությունը, կամ հայուհիները սպորտում էլ են չեմպիոն Թույլ սեռի ներկայացուցիչների հզորությունը, կամ հայուհիները սպորտում էլ են չեմպիոն - Sputnik Արմենիա](https://cdn.am.sputniknews.ru/img/1639/87/16398736_0:0:1600:1065_600x0_80_0_0_2784453c28b28cd6a9050c4d2b0f4f8f.jpg)
Մելինե Դալուզյանը ևս Ծանրամարտի Եվրոպայի չեմպիոնի տիտղոսն է կրում: Իսկ ահա նուրբ ու փխրուն Անուշ Գրիգորյանը բռնցքամարտիկ է, Բռնցքամարտի Եվրոպայի երիտասարդական առաջնության չեմպիոն: Երիտասարդ հայուհին դեռ տարված է կարիերայով և անձնական ֆրոնտում, սպորտային լեզվով ասած` հաղթանակներ չի գրանցել։
Մեկ բան պարզ է `մեծ սպորտում կանայք վաղուց ունեն իրենց հաստատուն տեղը և տարբեր կարգի մրցումներում մեզ հպարտության առիթ են տալիս:
Այս պահի դրությամբ շախմատի Հայաստանի կանանց հավաքականն Աստանայում մասնակցում է աշխարհի թիմային առաջնությանը։ Չնայած մեր թիմն առայժմ այնքան էլ հաջող հանդես չի գալիս, միևնույնն է` մենք շարունակում ենք հավատալ, որ կին մարզիկին բնորոշ պատվախնդրությամբ, մերոնք այստեղ էլ իրենց խոսքը դեռևս կասեն:
Եվս մեկ անգամ շնորհավորում ենք հայ մարզուհիներին Կանանց միջազգային օրվա կապակցությամբ, եղե՛ք առողջ, և թող միշտ հաղթանակները ուղեկցեն ձեզ: