«2017 թվականին կազմված 25 հազար կամերալ արձանագրություններից 17 հազարին չէին արձագանքել տնտեսվարող սուբյեկտները, իսկ 2018 թվականին 38 հազար ուսումնասիրություններից 25 հազարի վերաբերյալ հարկային մարմին է ներկայացվել ճշգրտված հաշվարկ»,- Sputnik Արմենիայի հետ զրույցում ասաց Հարությունյանը:
Կամերալ ուսումնասիրություններով հարկ վճարողներին լրացուցիչ հարկային պարտավորություններ չեն առաջադրվում, այլ ընդամենը ուսումնասիրությունների ընթացքում ի հայտ եկած անհամապատասխանությունների վերաբերյալ տեղեկացվում է հարկ վճարողը և 5 աշխատանքային օրվա ընթացքում տնտեսվարող սուբյեկտը պարտավորվում է իր հաշվարկներում և հաշվետվություններում կատարել համապատասխան ճշգրտումներ և դրանցից բխող հարկային պարտավորություններ, իսկ չհամաձայնելու դեպքում` իրավունք ունի ներկայացնել առարկություններ, որոնք հարկային մարմնի կողմից հիմնավոր համարվելու դեպքում կբերեն գործընթացի ավարտին:
Այս արձանագրություններին չարձագանքելու դեպքում, գործընթացը տեղափոխվում է կոշտ վարչարարության դաշտ, որի ընթացքում հարկային մարմինը շարունակում է կիրառել վարչարարության այլ գործիքներ, այդ թվում համալիր հարկային ստուգումներ:
Կամերալ ուսումնասիրությունների արդյունքում հարկ վճարողները ճշգրտել են հարկային հաշվարկները և 2018 թվականի բյուջե վճարել են լրացուցիչ 7 մլրդ դրամ հարկ, ինչը 2017 թվականի համեմատ աճել է 80 %-ով:
Այսպիսով` սա գործիք է, որը անհրաժեշտ է, թե' պետության, թե' գործարար աշխարհին:
