ԵՐԵՎԱՆ, 7 մարտի – Sputnik. ՀՀ կառավարությունը 20 600 եվրո հատկացրեց մարտի 1-ի գործով դատապարտված Մուշեղ Սաղաթելյանին վճարելու համար։ Նման որոշում այսօր կայացրեց գործադիրը` առաջնորդվելով ՄԻԵԴ որոշմամբ։
Մարդու իրավունքների եվրոպական դատարանը 2018 թվականի սեպտեմբերի 20-ին «Մուշեղ Սաղաթելյանն ընդդեմ Հայաստանի» գործով կայացրած վճռով պարտավորեցրել է ՀՀ–ին Սաղաթելյանի խախտված իրավունքների համար որպես արդարացի հատուցում վճարել 20600 եվրո գումար։
Եվրոպական դատարանի վճիռն օրինական ուժի մեջ է մտել 2018 թվականի դեկտեմբերի 20-ին: Վճռով սահմանված հատուցման գումարի վճարման վերջնաժամկետը 2019 թվականի մարտի 20-ն է:
Գործը վերաբերում է 2008 թվականի մարտի 1-ին։ Ըստ ՄԻԵԴ վճռի` բողոքի ակցիայի մասնակից Մուշեղ Սաղաթելյանը ոստիկանության բաժանմունքում դաժան վերաբերմունքի է արժանացել, խախտվել է նաև նրա ազատության իրավունքը, քանի որ նա առանց կալանքի որոշման 16 ժամ պահվել է անազատության մեջ։
Դատարանն արձանագրել է նաև Սաղաթելյանի արդար դատաքննության և հավաքների ազատության իրավունքի խախտումը։
Հիշեցնենք՝ Մուշեղ Սաղաթելյանը մեղավոր էր ճանաչվել «Իշխանության ներկայացուցչի նկատմամբ բռնություն գործադրելու» և «Ապօրինի կերպով զենք, ռազմամթերք, պայթուցիկ նյութեր ձեռք բերելու կամ կրելու» մեջ: Ըստ մեղադրական եղրակացության` նա, պարբերաբար մասնակցելով 2008 թ. փետրվարի 19-ի նախագահական ընտրություններից հետո իրականացվող զանգվածային հրապարակային միջոցառումներին, «մարտի 1-ին չենթարկվելով ոստիկանության աշխատակիցների օրինական պահանջներին, հարձակվելով ոստիկանության դասակի հրամանատար Արսեն Արշակյանի վրա, փայտով հարվածներ էր հասցրել վերջինիս գլխին՝ պատճառելով առողջությանը թեթև վնաս ու թաքնվել ամբոխի մեջ»։ Պարզվել էր նաև, որ Մուշեղ Սաղաթելյանն «ապօրինի կրել էր քաղաքացիական շեղբավոր սառը զենք հանդիսացող գործարանային արտադրության դանակ»:
