ԵՐԵՎԱՆ, 4 մարտի — Sputnik. Հայաստանի և Եվրամիության միջև համապարփակ և ընդլայնված գործընկերության մասին համաձայնագրի իրագործումը հայ հասարակությունում կհանգեցնի կարևորագույն որակական փոփոխությունների, ասել է Հայաստանի վարչապետ Նիկոլ Փաշինյանը` ելույթ ունենալով Եվրախորհրդարանի արտաքին կապերի հանձնաժողովում։
Նրա խոսքով` Հայաստանում տեղի ունեցած վերջին ընտրություններն առաջինն են եղել, որոնք չեն վիճարկվել որևէ ուժի կողմից։ Եվ ներկա ընտրությունները ստացել են եվրոպացի դիտորդների բարձր գնահատականը, որոնք դրանք անվանել են ազատ և թափանցիկ։
«Ես կարծում եմ, որ ժողովրդավարության հաղթանակն անդառնալի է մեր երկրում։ Իմ համոզմունքը հիմնված է հետևյալի վրա. ժողովրդավարության գաղափարները խորապես արմատացած են մեր ավանդույթում։ Դրա խեղաթյուրումը, որին մենք հետևել ենք վերջին 20 տարիների ընթացքում, տեղի է ունեցել ժողովրդավարության ի սկզբանե ընտրված ուղուց շեղվելու, մեր արժեքներն ու հույսերը աղավաղելու պատճառով», – ասել է Փաշինյանը։
Նրա խոսքով` ժողովրդավարական փոփոխությունները թելադրվել են հայ հասարակության և 6–միլիոնանոց սփյուռքի պահանջներով։ Իշխանափոխությունը թելադրված չի եղել արտաքին ուժերով և երկրի արտաքին քաղաքականությունում չի հանգեցրել կտրուկ փոփոխությունների։ Հայաստանը շարունակում է հավատարիմ մնալ գործընկերների առջև ունեցած պարտավորություններին։
Ժողովրդավարությունը թույլ է տալիս ամրապնդել տնտեսությունը և քաղաքական համոզմունքները, որոնք շատ կարևոր են երկրի զարգացման համար։ Դրա օգնությամբ պետք է լուծել մի շարք խնդիրներ։ Առաջին հերթին, դա աղքատությունն է։
«Մեր հասարակության մեկ երրորդն ապրում է աղքատության մեջ։ Նրանք կազմել են գլխավոր սոցիալական ռեսուրսը ընտրողների ձայները գնելու համար։ Միջին խավի կրճատմանը հետևել է ընտրություններում ժողովրդավարության կրճատումը։ Ուստի ուժեղ և կենսունակ միջին խավը զարգացման նախադրյալներից է։ Եվ տնտեսական հեղափոխությունը մեր հաջորդ խնդիրն է», – նշեց Փաշինյանը։
Մյուս նպատակների շարքում կոռուպցիայի դեմ պայքարն է, անօրինական մենատիրություններն արմատախիլ անելը, անկախ դատական համակարգը, օրենքի գերակայությունը, հավասար պայմանները բոլոր տնտեսական և քաղաքական խաղացողների համար։
«Եվրամիության հետ համապարփակ և ընդլայնված գործընկերության մասին համաձայնագրի ներդրումը շատ կարևոր է մեր բարեփոխումների հաջողության համար։ Դրա դրույթների իրագործումը հասարակությունում կհանգեցնի կարևորագույն որակական փոփոխությունների։ Մենք տրամադրված ենք շարունակել ակտիվ և արդյունավետ համագործակցությունը եվրոպական գործընկերների հետ փոխադարձ հետաքրքրություն ներկայացնող բոլոր ոլորտներում», – ասել է Փաշինյանը։
Նա նշել է, որ ԵՄ երկրների մոտ մեկ երրորդն արդեն վավերացրել է համաձայնագիրը, և Հայաստանը հույս ունի, որ մնացածը հետևում են այդ օրինակին։
Փաշինյանը նշել է վիզային ռեժիմի ազատականացման մասին երկխոսության կարևորությունը, որը կօգնի ամրապնդել Հայաստանի և Եվրոպայի հասարակությունների միջև կապերը։
