ԵՐԵՎԱՆ, 2 մարտի – Sputnik, Արմենուհի Մխոյան. Շիրակի պետական համալսարանի ռեկտորի պաշտոնին առայժմ կշարունակի նստել ժամանակավոր պաշտոնակատարը` պրոռեկտոր Երվանդ Սերոբյանը, որովհետև ռեկտորի պաշտոնի համար պայքարող երկու թեկնածուներից ոչ մեկն այսօր չստացավ պահանջվող 13 քվեն։
Ռեկտորի աթոռի համար պայքարում էին երկու թեկնածու՝ մաթեմատիկայի, ֆիզիկայի եւ տեղեկատվական տեխնոլոգիաների ամբիոնի դասախոս, տեխնիկական գիտությունների թեկնածու, դոցենտ Անդրանիկ Սարգսյանն ու «Եվրասիա» միջազգային համալսարանի օտար լեզուների եւ գրականության ամբիոնի պրոֆեսոր, բանասիրական գիտությունների դոկտոր, պրոֆեսոր Լուսինե Ֆլջյանը:
Ռեկտորի թափուր պաշտոնի համար հայտարարված մրցույթում թեկնածուները ներկայացրին իրենց ծրագրերը, հետո պատասխանեցին խորհրդի անդամների հարցերին: Հաշվիչ հանձնաժողովի ձևավորումից հետո տեղի ունեցավ գաղտնի քվեարկություն: Շիրակի մայր բուհի ռեկտոր կընտրվեր այն թեկնածուն, որը փակ և գաղտնի քվեարկությամբ կստանար խորհրդի 24 անդամների քվեների կեսից ավելին՝ անհրաժեշտ 13 քվեն, բայց Անդրանիկ Սարգսյանի օգտին գրանցվեց 8, իսկ Լուսինե Ֆլջյանի օգտին 6 ձայն, 9 քվե համարվեցին անվավեր:
Նշենք, որ ռեկտորի պաշտոնի համար սկզբում ներկայացրել էին չորս հայտ: Թեկնածուներից մեկը, սակայն, ինքնաբացարկ էր հայտնել, իսկ մյուս թեկնածուի՝ Մանուշակ Կարապետյանի մասնակցությունը բուհի հոգաբարձուների խորհուրդը չընդունեց` հաշվի առնելով այն հանգամանքը, որ թեկնածուն հանրային կառավարման և բարձրագույն կրթության ոլորտում փորձ չունի։
Հիշեցնենք, որ բուհի նախկին ռեկտոր Սահակ Մինասյանը հրաժարական էր ներկայացրել 2018 թվականի մայիսի 15-ին: Ռեկտորի պարտականությունները ժամանակավորապես ստանձնել է համալսարանի պրոռեկտոր Երվանդ Սերոբյանը:
Թե երբ է կայանալու ռեկտորի հաջորդ ընտրությունները, առաջիկա նիստի ընթացքում կորոշի բուհի հոգաբարձուների խորհուրդը:
