ԵՐԵՎԱՆ, 19 փետրվարի — Sputnik. ՀՀ երկրորդ նախագահի Ռոբերտ Քոչարյանի որդի Սեդրակ Քոչարյանը պատրաստվում է դատական հայց ներկայացնել ՀՀ Ազգային անվտանգության ծառայության դեմ: Այս մասին Sputnik Արմենիային ասաց Ռոբերտ Քոչարյանի գրասենյակի ղեկավար Վիկտոր Սողոմոնյանը:
Սեդրակ Քոչարյանը դատի է տալու Ազգային անվտանգության ծառայությանը (ԱԱԾ)՝ իր անմեղության կանխավարկածը կոպտագույն կերպով խախտելու պատճառով։ Առաջիկայում Սեդրակ Քոչարյանի փաստաբանները հայցով կդիմեն դատարան և հանդես կգան հայտարարությամբ։
Հիշեցնենք, որ այսօր ՀՀ Ազգային անվտանգության ծառայությունը պաշտոնական հաղորդագրությունն էր տարածել, որում ներկայացրել է, թե ինչ փաստերի հիման վրա է ՀՀ երկրորդ նախագահ Ռոբերտ Քոչարյանի որդի Սեդրակ Քոչարյանին մեղադրանք առաջադրվել։
ԱԱԾ–ն հայտնում է, որ քրեական գործի շրջանակներում իրականացված լայնածավալ քննչական գործողությունների և օպերատիվ-հետախուզական միջոցառումների արդյունքում բացահայտել է առանձնապես խոշոր չափերով հարկեր չվճարելու և հանցավոր ճանապարհով ձեռք բերված եկամուտներն օրինականացնելու հանցադեպեր, որոնց կազմակերպման հետ անմիջական առնչություն է ունեցել Սեդրակ Քոչարյանը։
Ըստ գործի նյութերի, Քոչարյանի որդին, իր հիմնադրած ՍՊԸ–ներից մեկի պատասխանատու աշխատակիցներին հրահանգել է հաշվարկում ակնհայտ կեղծ տվյալներ մտցնել` առանձնապես խոշոր չափերով եկամտային հարկ չվճարելու նպատակով։
Բացի այդ, գումարի ծագումը թաքցնելու համար կատարել է մի շարք բանկային փոխանցումներ և այդ գումարով գույք ձեռք բերել։
