ԵՐԵՎԱՆ, 19 փետրվարի — Sputnik. Հայաստանում արտախորհրդարանական կուսակցությունները համախմբվել են «Նոր Սահմանադրություն» նախաձեռնության շուրջ, որի նպատակը երկրի նոր մայր օրենքի ընդունումն է։
Այս գաղափարին միացել է 10 կուսակցություն և խումբ` «Ազգային առաջընթաց», «Արդարություն», «Գործարար կուսակցություն», «Զարթոնք» գաղափարաքաղաքական խումբ, «Ժողովրդի ձայնը» նախաձեռնություն, «Հայաստանի կառուցողական կուսակցություն», «Հայկ Հայկազուններ» կուսակցություն, «Հայ մասնագետների խորհուրդ», «Նժդեհյան ցեղակրոն» և «Քրիստոնեա–ժողովրդավարական վերածնունդ» կուսակցություններ։
Սրանցից մի քանիսի անվանումը հանրությանը գրեթե անծանոթ է, մյուսների մասին գիտեն վերջին ԱԺ արտահերթ ընտրությունների շնորհիվ։ Դրանք են «Ազգային առաջընթացը» և «Քրիստոնեա–ժողովրդավարական վերածնունդը»։ «Հայ կառուցողական կուսակցության» առաջնորդ Անդրեաս Ղուկասյանին ճանաչում են քաղաքացիական և քաղաքական ակցիաներից։ Նա նաև 2013 թվականին ՀՀ նախագահ էր առաջադրվել։
Երեքշաբթի հրավիրված մամուլի ասուլիսին Ղուկասյանն ու «Ազգային առաջընթացի» ներկայացուցիչ Լուսինե Հարոյանը, նախաձեռնությունը ներկայացնելիս, հայտարարեցին, որ գործող Սահմանադրությունը ընդունվել էր հանրաքվեի ժամանակ բազմաթիվ կեղծիքների միջոցով։ Հետևաբար, նոր Հայաստանը նոր Սահմանադրության կարիք ունի։
«Մենք սպասում էինք, որ «Իմ քայլը» դաշինքը իշխանության գալով սահմանադրական փոփոխությունների գործընթացը կնախաձեռնի, քանի որ այն ժամանակ իրենք էին խոսում կեղծիքների մասին։ Սակայն դա տեղի չունեցավ, և մենք որոշեցինք անձամբ սահմանադրական փոփոխություններ նախաձեռնել։ «Թավշյա հեղափոխությունը» պետք է տրամաբանական ավարտ ունենա օրենսդրական հեղափոխության տեսքով», – նշեց Հարոյանը։
Ղուկասյանն իր հերթին կարծում է, որ հասարակությունը պետք է հնարավորություն ունենա ինքնուրույն գործադիր մարմնի ղեկավար ընտրի, այլ ոչ թե կուսակցությունները, որոնք հետագայում վարչապետ են ընտրում։ Նրա խոսքով` սրա անհրաժեշտությունը կա, որովհետև քաղաքացիները չեն վստահում կուսակցություններին։
