ԵՐԵՎԱՆ, 19 փետրվարի — Sputnik. ՀՀ քննչական կոմիտեն ավարտել է 2018 թվականի ապրիլյան հանրահավաքների օրերին քաղաքացիների նկատմամբ բռնություն գործադրելու դեպքերով քրեական գործի նախաքննությունը:
Ինչպես հայտնում են Քննչական կոմիտեից, մեղադրանք է առաջադրվել 11 անձի, որոնց թվում են նաև Մասիսի նախկին քաղաքապետ Դավիթ Համբարձումյանն ու նրա եղբայրը։
Քրեական գործի վարույթի շրջանակներում պարզվել է, որ 2018 թվականի ապրիլին Երևան քաղաքում և մարզերում կազմակերպված խաղաղ հավաքների և երթերի ընթացքը խաչընդոտելու համար կազմվել են հատուկ խմբեր, որոնք անհարգալից վերաբերմունք դրսևորելով, խուլիգանական դրդումներով հայհոյանքներ տալով, բռնություն են գործադրել հավաքների մասնակիցների նկատմամբ:
Մասիսի նախկին քաղաքապետին, նրա եղբորն ու ևս 9 անձի մեղադրանք է առաջադրվել խուլիգանության ու զանգվածային անկարգությունների փաստերով։
Քաղաքապետի տեղակալ Կարեն Օհանյանին, Մասիս քաղաքի բնակիչներ Ս.Սահակյանին, Ա.Հակոբյանին, Ա.Խանջյանին ու Ա.Մամուլյանին մեղադրանք է առաջադրվել միայն ՀՀ քրեական օրենսգրքի 225-րդ հոդվածի 2-րդ մասով, այն է` զանգվածային անկարգությունների ժամանակ բռնություն գործադրելը, ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը։ Այս արարքների համար նրանց սպառնում է 3-8 տարվա ազատազրկում։
Իսկ Մասիսի քաղաքապետ Դավիթ Համբարձումյանին, նրա եղբորը` Գոռ Հարությունյանին, Մ.Պողոսյանին և Հ. Հակոբյանին բացի վերոհիշյալից մեղադրանք է առաջադրվել նաև ՀՀ քրեական օրենսգրքի 258 հոդվածի տարբեր կետերով, այն է` Խուլիգանությունը, որը զուգորդվել է անձի առողջությանը միջին ծանրության վնաս պատճառելով, բացառիկ ցինիզմով, զենքի կամ որպես զենք օգտագործվող առարկաների գործադրմամբ։ Այս արարքի համար նրանց սպառնում է հավելյալ 3-7 տարվա ազատազրկում։
Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել նախաքննության օրինականության նկատմամբ հսկողություն իրականացնող դատախազին:
