ԵՐԵՎԱՆ, 19 փետրվարի — Sputnik. «Տատիկիս վարսերը» ֆիլմի ռեժիսոր Հովհաննես Գալստյանը, որն արդեն 17 օր է` հացադուլ է անում, Մշակույթի նախարարությունից նամակ է ստացել, որում նրան ուղղված ծանր մեղադրանքներ կան։ Այսօր լրագրողների հետ հանդիպման ժամանակ այս մասին ասաց ռեժիսորը։
«Տատիկիս վարսերը» ֆիլմը Բուլղարիայի, Գերմանիայի և Հայաստանի առաջին համատեղ նախագիծն է։ Ռեժիսորի խոսքով` Հայաստանի ազգային կինոկենտրոնը պետք է 88 մլն դրամ հատկացներ, սակայն հատկացվել է 23 մլն–ը։ Նա պահանջում է մնացած գումարը։
Հացադուլ հայտարարած ռեժիսորին 5 օր առաջ միացել է նաև Արցախյան պատերազմի վետերան Մհեր Մազմանյանը։
Ռեժիսորը հերքում է Մշակույթի նախարարության բոլոր մեղադրանքները` դրանք անվանելով «անճշտություններ» ։
«Մշակույթի նախարարության նամակն ընթերցեմ վերջից։ Չորս էջում շարադրած կոռուպցիոն մեղադրանքներից հետո գերատեսչությունը որոշում է բացառության կարգով թույլատրել, որ իմ նախագիծը մասնակցի 2019 թվականին հայտարարված մրցույթին, ընդ որում` բոլորի հետ հավասար պայմաններով, ինչպես նաև նախապատրաստվում է խումբ ձևավորել, որը կլուծի «Տատիկիս վարսերը» ֆիլմի հետ կապված խնդիրները` ֆիլմարտադրությունը շարունակելու համար», – ասաց Գալստյանը։
Նրա խոսքով` Մշակույթի նախարարության տրամաբանության համաձայն` մարդը կարող է հանցագործ, կոռուպցիոներ լինել, սակայն դա չի խանգարում, որ գերատեսչությունն աչք փակի ու թույլ տա մասնակցել մրցույթին։
Գալստյանն ընդգծեց, որ Մշակույթի նախարարությունը մշտապես տարբեր տվյալներ է հայտնում նախագծի մասին` մեղադրելով նրան պետական միջոցները ծախսելու մեջ։
Դրանից բացի, նախարարությունը հայտարարում է, որ 2010-2014 թվականներին Գալստյանը պետությունից 93,4 մլն դրամ է ստացել «Թողություն» ֆիլմի համար, սակայն ֆիլմը մինչ օրս ավարտին չի հասցվել, միայն 15-րոպեանոց տեսանյութ է նկարահանվել։ Ռեժիսորը հերքում է նաև այդ մեղադրանքը։
«Այդ ֆիլմի գլխավոր դերակատար Կարեն Ջանիբեկյանը մահացավ, հետո մահացավ համահեղինակը։ Այդ պատճառով էլ ֆիլմը չավարտվեց, նկարահանումները հետաձգվեցին։ Ֆիլմն ընթացքի մեջ է։ Նկարահանվել է 97 րոպե, ոչ թե 15, ինչպես նշում է Մշակույթի նախարարությունը», – պարզաբանեց Գալստյանը։
Նա ավելացրեց, որ Կինոկենտրոնում շատ են նման անավարտ ֆիլմերը, բայց դա, չգիտես ինչու, որևէ մեկին չի մտահոգում։
Ռեժիսորն ընդգծեց, որ «Թողություն» ֆիլմը հնարավոր կլինի ավարտել միայն այն ժամանակ, երբ ինքը նկարահանի «Տատիկիս վարսերը»։
Դեկտեմբերի 3-ին, երբ Հովհաննես Գալստյանն առաջին անգամ հացադուլ հայտարարեց, միջգերատեսչական հանձնաժողովի նիստ կայացավ, որի կազմում ընդգրկված էին Հայաստանի ազգային կինոկենտրոնի ղեկավար Շուշանիկ Միրզախանյանը, մշակույթի փոխնախարար Նազենի Ղարիբյանն ու այն ժամանակ մշակույթի նախարար Լիլիթ Մակունցը։
Շուշանիկ Միրզախանյանը պնդում է, որ որևէ հանձնարարություն այս կապակցությամբ չի ստացել։ Ավելին, մեղադրում է ռեժիսորին խաբեբայության մեջ։ Ղարիբյանն էլ ռեժիսորին ստախոս, խարդախ և զրպարտիչ է անվանում։
Ավելի վաղ «Իմ քայլը» խմբակցության ղեկավար, մշակույթի նախկին նախարար Լիլիթ Մակունցը կոչ էր արել «Տատիկիս վարսերը» ֆիլմի ռեժիսոր Հովհաննես Գալստյանին դադարեցնել հացադուլը ոչ միայն հանուն կինոյի և իր ընտանիքի, այլև հանուն արդարության։
