ԵՐԵՎԱՆ, 15 փետրվարի — Sputnik. Բնական գազի համար կառավարությունը որոշել է նոր չափման միավոր սահմանել` խորանարդ մետրը փոխարինելով կիլոգրամներով։ Կառավարության համոզմամբ` այս փոփոխությունը թույլ կտա սպառողներին ազատվել վաճառողների խաբեությունից։
Համապատասխան որոշումն այսօր ընդունվել է կառավարության հերթական նիստում։ Դրա համար գործադիրը փոփոխություններ է կատարել ՀՀ Հարկային օրենսգրքում։
Օրինագիծն այսօր քննարկվեց ու հավանության արժանացավ կառավարության նիստում և առաջիկայում կներկայացվի նաև խորհրդարանի հաստատմանը։
Առաջարկվող փոփոխությամբ սեղմված բնական գազը Հայաստանում կվաճառվի 1 տոննան` 34000 դրամ գնով` ներկայում գործող 1000 խմ–ն` 25000 դրամի փոխարեն։
Նախատեսվում է, որ նոր կարգավորումներն ուժի մեջ կմտնեն 2019 թվականի ապրիլի 1-ից:
Ինչպես կառավարության նիստի ընթացքում հայտարարեց ֆինանսների նախարար Ատոմ Ջանջուղազյանը, նախագծի ընդունման նպատակը գազով շահագործող ավտոմեքենաների շուրջ 700 000 սեփականատերերի իրավունքների պաշտպանությունն է։
«Մենք տարբեր ահազանգեր ենք ստանում քաղաքացիներից, որ գազը հաշվարկվում է ճնշումով, բայց այն կարող է տարբեր ծավալներ ունենալ, դրա համար ասում ենք, որ գազը պիտի հաշվարկվի կիլոգրամով ու հարկը վճարվի կիլոգրամով»,– ասաց Փաշինյանը` հատուկ ընդգծելով, որ հարկային պարտավորությունների ավելացման այս փոփոխությունը չի հանգեցնի։
«Այսինքն` եթե գազալցակայանից ասում են, որ հարկային վճարումներն ավելացել են, ուրեմն խոստովանում են, որ ստեղծման օրից սպառողներին խաբել են»,– ասաց Փաշինյանը` հարկային մարմիններին հորդորելով ուշադիր լինել այդ տեղեկատվության նկատմամբ։
Վարչապետը միաժամանակ նաև կանխատեսեց, որ առաջարկվող փոփոխությունը մեկնաբանվելու է որպես հերթական թանկացում։
Всё пропало! Гипс снимают, клиент уезжает,- ասաց Փաշինյանը` կանխատեսելով «որոշ լրատվամիջոցների» արձագանքը։
