ԵՐԵՎԱՆ, 14 փետրվարի –Sputnik. Պարզվում է` հումորիստներն էլ կարող են նեղանալ, այդ թվում սոցցանցերում բաժանորդների կողմից արված մեկնաբանություններից։ Օրինակ`հայտնի հումորիստ Գարիկ Մարտիրոսյանին ամենից շատ զայրացնում են «հիմար մեկնաբանությունները»։ Այդ մասին նա ասել է MK.ru էլեկտրոնային պարբերականին տված հարցազրույցում։
«Երբ ինձ ասում են` քիթդ մեծ է և կզակ ունես, դու ծեր ես, ակնոց ես կրում, և ընդհանրապես, դու արդեն ճաղատացող, ծերացող հումորիստ ես, այդ ամենն ինձ ցավ է պատճառում, քանի որ դրանք հիմար մեկնաբանություններ են նրա, ինչը մեկնաբանել պետք չէ։ Ցավալի է, քանի որ այդ մարդիկ ինձ ճանաչում են», – խոստովանել է Մարտիրոսյանը։
Հումորիստին վիրավորում է նաև, երբ նրան գրում են` հորեղբայր, դու ծերացել ես։ Կրկնակի ցավալի է այն հանգամանքը, որ դա ասում են իր իսկ բաժանորդները։ Նա խորհուրդ է տալիս նրանց ապաբաժանորդագրվել իր էջից։
Միևնույն ժամանակ Մարտիրոսյանն իր հումորներում երբեք որևէ մեկի արտաքին տեսքը չի ծաղրում, միայն արվեստը։ Նա կարծում է, որ եթե չանդրադառնալ մարդու անձին, նրա ֆիզիկական տվյալներին, հիվանդությանը, վախերին, կյանքում ունեցած ողբերգությանը, այլ մեկնաբանել արվեստը, արարքները, պրոֆեսիոնալ գործունեության արտադրանքը, այդ դեպքում նեղանալու առիթ չի լինի։
«Եթե ես ասում եմ, որ այս ինչ երգչուհին անտաղանդ տեսահոլովակ է նկարահանել, և որ նա ընդհանրապես ձայնային տվյալներ չունի և անտանելի է երգում, թող որքան ուզում է նեղանա։ Քանի որ ես չեմ վիրավորում իրեն, որպես աղջիկ, կին, քաղաքացի։ Ես պարզապես վերլուծում եմ։ Բարի եղիր լսիր քննադատությունը, եթե սկսել ես երգել», – պարզաբանում է Մարտիրոսյանը։
Քաղաքականության մեջ` զրո
Մարտիրոսյանն իրեն քաղաքականության մեջ զրո է համարում, քանի որ նա «վատ» թեկնածու է և որևէ երկրի կառավարել չի կարող։
«Եթե ինձ փոքր անմարդաբնակ կղզի վստահեին, ես նույնիսկ այն չէի կարողանա կառավարել։ Քաղաքականությունից զրո եմ», – ասել է հումորիստը։
Հարցին`իսկ եթե քեզ Հայաստանի նախագահի պաշտոնին առաջադրեին, հեռուստահաղորդվարն ասել է, որ հաճույքով կուսումնասիրի այդ առաջարկը և սրտանց կծիծաղի։ Քանի որ Հայաստանն արդեն հիանալի նախագահ ունի` Արմեն Սարգսյանը, որը շատ լավ է կատարում իր պարտականությունները։
«Նա հիանալի, կիրթ անձնավորություն է, այնպես որ Հայաստանը ավելի լավ նախագահ գտնել չի կարող։ Իմ թեկնածությունն ավտոմատ կերպով չեղարկվել է ոչ մրցունակ լինելու պատճառով։ Ես ինքնաբացարկ եմ տալիս», – ասել է Մարտիրոսյանը։
Միևնույն ժամանակ նա խոստովանում է, որ եթե հումորիստը քաղաքական թեմաներ չի շոշափում, ապա չի հաջողում։
Չեմ կարող և չեմ ուզում
Այն հարցին, թե արդյո՞ք նա գումարի դիմաց պատվերով կոնկրետ մարդկանց համար ելույթ ունենում է, Գարիկը բացասաբար շարժեց գլուխը։ Նա չափազանց բացասական է վերաբերվում ունևոր մարդկանց «պատվերներին»։ 15 տարվա ընթացքում նա զրոյացրել է նման միջոցառումներին իր մասնակցությունը։ Ծննդյան օրերին, մկրտություններին, հոբելյաններին հրաժարվում է ելույթ ունենալ որպես հումորիստ, թամադա, ճառ ասող և այլն։
«Ոմանք ինձ դրա պատճառով բարդույթավորված, փակ անձնավորություն են համարում, թող համարեն։ Չեմ սիրում ելույթ ունենալ հարբած և լափող մարդկանց դիմաց։ Հրաժարվում եմ, միլիոնավոր դոլարներ չեմ վաստակում, բայց ես ինձ լավ և ներդաշնակ եմ զգում։
Երբեմն, շատ հազվադեպ, տարին մեկ անգամ, մեծ կորպորատիվներ վարում եմ, ընկերներիս մոտ, սակայն հարսանիքին փեսեղբայր աշխատելը ինձ համար չէ, երբեք դրանով չեմ զբաղվել։ Չեմ կարող և չեմ ուզում», – խոստովանել է Մարտիրոսյանը։
Այնուամենայնիվ, Գարիկը համոզված է, որ հումորը միշտ է պահանջված, առանց հումորի մարդու կյանքը սև ու սպիտակ կլինի։ Սա է մարդու և կենդանու տարբերությունը։
Կուռքերի մասին
Գարիկի ամենագլխավոր կուռքը հումորիստ Գենադի Խազանովն է։ Փոքր տարիքում Մարտիրոսյանը մի տեսաերիզ ուներ, որի վրա ձայնագրված էր Խազանովի բոլոր մենախոսությունները։
«Այն ժամանակ փոքր էի, շատ բան չէի հասկանում, սակայն ինձ անչափ դուր էր գալիս այն ամենը, ինչ նա ասում էր։ Արտիստիզմը, որը խորհրդային և ռուսական էստրադա բերեց Գենադի Խազանովը, բացառիկ է։ Այնպես էր կարողանում մատուցել երգիծական նյութը, նույն մենախոսությունը մեկ ուրիշին տայիր 80 տոկոսը կփչացներ։ Իսկ Խազանովը, պարզապես հումորի հանճար է», – կարծում է Գարիկը։
Հանճար է նա անվանում նաև Նիկուլինին և Ֆրունզիկ Մկրտչյանին։ Վերջինը նրա համար հայկական հումորի մարմնացում է. անհավանական տխուր աչքերի համադրություն, սակայն ինչքան ուրախ մարդ։
Նրան չի ոգեշնչում Եվգենի Պետրոսյանի հումորը, իսկ Չարլի Չապլինը նրա համար արդեն հնացած է։
