ԵՐԵՎԱՆ, 9 փետրվարի — Sputnik, Նանա Մարտիրոսյան․ Ավելի քան երկու ամիս է` «Տատիկիս վարսերը» ֆիլմի շուրջ կրքերը չեն հանդարտվում։ Դեռ նախորդ տարվա վերջին թվում էր, թե ռեժիսոր Հովհաննես Գալստյաննը, մշակույթի նախարարությունն ու Ազգային կինոկենտրոնը կարողացել են պայմանավորվածության հասնել, ու ֆիլմի նկարահանումները շուտով կվերականգնվեն։ Պարզվեց` թվում էր... Հիմա կողմերը սպասում են վարչապետի ու դատարանի որոշումներին։
Ամեն ինչ սկսվեց 2018 թվականին, երբ Հայաստանի ազգային կինոկենտրոնը նոր կանոնակարգ հաստատեց ու չեղարկեց ֆիլմի նկարահանման համար 88 միլիոն դրամ տրամադրելու` ավելի վաղ ընդունած պարտավորությունը։
Գալստյանն էլ որոշեց բողոքել ու հացադուլ հայտարարեց։ Դրանից հետո միջգերատեսչական հանձնաժողովի նիստ կայացավ, որի կազմում ընդգրկված էին Հայաստանի ազգային կինոկենտրոնի ղեկավար Շուշանիկ Միրզախանյանը, մշակույթի փոխնախարար Նազենի Ղարիբյանն ու այն ժամանակ մշակույթի նախարար Լիլիթ Մակունցը։ Կարծես թե ֆինանսավորումը շարունակելու երաշխիքներ տվեցին։
Թվում էր` հարցն այսքանով պիտի փակվեր, բայց հունվարի 18-ին ռեժիսորը հայտարարեց, որ վերսկսելու է հացադուլը։ Պարզվեց, որ մշակույթի նախարարության լուծարմանը զուգահեռ հօդս է ցնդել նաև ֆինանսավորման խոստումը։
Կինոկենտրոնի ղեկավար Շուշանիկ Միրզախանյանը պնդում է, որ այդ հարցով ոչ մի հանձնարարություն չի ստացել։ Ավելին՝ ռեժիսորին մեղադրում է խաբեբայության համար։
Իսկ Գալստյանն արդեն փետրվարի 4 –ին կրկին հացադուլ է հայտարարել ու ֆինանսավորումից բացի պահանջում է հրապարակել միջգերատեսչական հանձնաժողովի նիստի ձայնագրությունը՝ բանավոր հանձնարարության ապացույցով։
Հասկանալով, որ նախկին նախաար Մակունցից անիմաստ է որևէ բան պահանջել, ռեժիսորը փետրվարի 6-ին փորձել է հանդիպել վարչապետ Նիկոլ Փաշինյանի հետ։
Սակայն դա էլ չի հաջողվել։ Նրան ընդունել է Փաշինյանի օգնական Նաիրի Սարգսյանը․ Բնականաբար ոչ մի խոստում չի տվել ու միայն վստահեցրել է, որ ամեն ինչ կփոխանցի վարչապետին։ Ռեժիսորն առանձնապես չի հավատում պաշտոնյաների խոստումներին, բայց մտադիր է հասնել կինոկենտրոնի հետ պայմանավորվածությունների իրականացմանը։
Ռեժիսորին աջակցում է նաև կինը՝ Մարինե Զաքարյանը։ Նա նույնպես պատրաստվում է միանալ հացադուլին, բայց միայն բողոքի տասներորդ օրը։ Կինը կարծում է, որ Կինոկենտրոնը խոչընդոտում է աշխատանքի ու ստեղծագործության իրենց իրավունքի իրականացումը։ Նրա հետ համամիտ չէ մշակույթի փոխնախարար Նազենի Ղարիբյանը, որն իր ֆեյսբուքյան էջում գրել է, թե չի ընդունելու ստախոսությունը, խաբեբայությունն ու խարդախությունը։
Մշակույթի նախարարության ներկայացուցիչը չի հասկանում՝ ինչ ֆինանսավորման մասին կարող է խոսք լինել, եթե ըստ կինոկենտրոնի հետ կնքած պայմանագրի՝ նա պետք է նկարահանումներ ավարտած լիներ 2017-ին։ Միաժամանակ նա հրաժարվում է հանդիպել Գալստյանի հետ, քանի դեռ նա Ղարիբյանի հասցեին հնչեցրած վիրավորանքների համար հրապարակավ ներողություն չի խնդրել։
Գալստյանն էլ չի պատրաստվում ներողություն խնդրել ու շարունակում է պնդել, որ ֆիլմի ֆինանսավորման կրճատումը պայմանավորված է նրանով, որ ինքը հանդես է գալիս կինոարտադրության նոր համակարգ ձևավորելու օգտին, «որտեղ չեն լինի մի քանի ՊՈԱԿ-ներ, ՀԿ-ներ և կառույցներ, որոնք իրար մեջ կկիսեն բյուջետային միջոցները և կխլեն այն ֆիլմերի փողերը, որոնք պետք է արտադրվեն»
Նա պնդում է, որ Միրզախանյանն ու Ղարիբյանը կոռումպացված են ու սպանել են հայկական կինեմատոգրաֆը։ Պաշտոնյաններն էլ մատ են թափ տալիս ու սառնասրտորեն կոչ անում սպասել դատարանի որոշմանը։
Գալստյանը չի ուզում սպասել, քանի որ քաշքշուկները վերջնականապես կտապալեն նախագիծը․ երեխաների դերերը կատարող դերասանները մեծանում են, ու ևս մեկ տարով հետաձգումը խաչ կքաշի արդեն նկարահանված 40 րոպեանոց նյութի վրա։
Նա նաև վախենում է, որ Գերմանիայի ու Բուլղարիայի ներդրողները կմտափոխվեն։ Թեև անկեղծ խոստովանում է, որ գործընկերները վճռականորեն են տրամադրված, ու նման սկանդալը լավ գովազդ կլինի, եթե ֆիլմն ի վերջո նկարահանվի։
