ԵՐԵՎԱՆ, 5 փետրվարի — Sputnik. Հայաստանը մասնակցել է Ռոտերդամի միջազգային կինոփառատոնին` «Կինոյի տաճար» ծրագրով, որը նվիրված է կինոռեժիսոր Սերգեյ Փարաջանովի 95–ամյակին։
Այդ մասին երեքշաբթի լրագրողներին հայտնեց Հայաստանի Ազգային կինոկենտրոնի ղեկավար Շուշանիկ Միրզախանյանը։
«Ինչպես հիշում եք, այս տարի լրացավ Փարաջանովի 95-ամյակը, և այս ողջ ցուցադրությունը յուրովի հարգանքի տուրք էր մեր վարպետի հոբելյանին: Փարաջանովն առաջին անգամ արտասահման է մեկնել Ռոտերդամի միջազգային փառատոնի կազմակերպիչների հրավերով 30 տարի առաջ՝ 1988 թվականին։ Փաստորեն 30 տարի անց նույն փառատոնում մենք ներկայացնում ենք Փարաջանովի ֆիլմերից հատվածներ»,-ընդգծեց Միրզախանյանը:
Միրզախանյանի խոսքով` ֆիլմի կադրերն ուղեկցվել են կոմպոզիտոր Տիգրան Մանսուրյանի երաժշտությամբ։
Ավելին, կազմակերպվել են «Կիևյան որմնանկարներ», «Արաբեսկներ Փիրոսմանիի թեմայով» և «Հակոբ Հովնաթանյան» ֆիլմերի ցուցադրությունները, որոնց թվայնացումը մեկնարկել էր 2018թ–ին։ Բոլոր դեպքերում դահլիճը լեփ–լեցուն է եղել, իսկ կինոսերները՝ ոգևորված։
«Այդ ծրագրի շնորհիվ մենք համագործակցության մասին բազմաթիվ առաջարկներ ստացանք տարբեր փառատոններից և հիմնադրամներից։ Բանակցություններ ենք վարում և այդ ծրագրով պատրաստվում ենք համաշխարհային շրջագայության», – ասաց Միրզախանյանը։
Նա հաղորդեց, որ կինոկենտրոնը մտադիր է ուսումնասիրել «Նռան գույնը» ֆիլմի ժապավենի 300 մետրը և 103 տուփերը, վերականգնել ամբողջ նյութը և ստեղծել նոր ֆիլմ։ Ի դեպ, մոնտաժով զբաղվում է 80–ամյա Մելսիդան, որը փոխանցում է իր վարպետությունը ստաժորին։
