ԵՐԵՎԱՆ, 3 փետրվարի –Sputnik. «Շտապօգնություն» ՓԲԸ–ի աշխատակիցները շարունակում են արմատական փոփոխություններ պահանջել։ Ծառայության շուրջ առաջացած կրքերը դեռ չեն հանդարտվում, սակայն հարցը տեղից չի շարժվում։ Սպասողական վիճակում են ոչ միայն բժիշկները, այլև «Շտապօգնություն» ՓԲԸ–ի ղեկավար Թագուհի Ստեփանյանը։
Աշխատակիցները բարեփոխումներ են պահանջում և սպառնում են աշխատանքից հրաժարվելու դիմում ներկայացնել, եթե աշխատելու համար նորմալ պայմաններ չստեղծվեն։
«Հարց է դրվել սոցփաթեթների և ծառայությունում աշխատող բժիշկների ապահովագրության»,– Sputnik Արմենիայի թղթակցի հետ զրույցում ասաց Ստեփանյանը։
Ավելի վաղ «շտապօգնության» բժիշկները բողոքում էին այն բանի համար, որ իրենց սոցփաթեթ, բժշկական ապահովագրություն չի տրամադրվում, թեև իրենց ծանրաբեռնվածությունը բուժկենտրոնների բժիշկների ծանրաբեռնվածությունից պակաս չէ։ Նրանք նաև պահանջում են բարձրացնել աշխատավարձերը։
«Շտապօգնության» բժիշկը մեկ հերթապահության համար 18 հազար դրամ է ստանում, բուժքույրը` 11 հազար դրամ, իսկ վարորդը` 10 հազար դրամ։
Նշենք, որ բժիշկներն ամսական 6-7 (1 դրույք) կամ 3-4 (կես դրույք) հերթապահություն են ունենում։ Ստացվում է, որ ամբողջական դրույքով աշխատող բժիշկը 126 հազար դրամ է ստանում մեկ ամսվա աշխատանքի դիմաց։
«Աշխատաժամերից դժգոհ են միայն երկու բժիշկ, որոնք կես դրույք են աշխատում։ Մյուսները չեն ցանկանում կրճատել իրենց աշխատանքային օրը։ Նրանց հարմար է ամսական 6-7 օր աշխատել և մյուս օրերին հանգստանալ», – ասաց Ստեփանյանը։
Ընդմիջման ժամանակ չունենալու մասին հարցին անդրադառնալով` Ստեփանյանը նշեց, որ 2018 թվականի վերջին և տոն օրերին կանչերի քանակը նորմայից ավելի է եղել։ Այդ իսկ պատճառով բժիշկներն իսկապես ընդմիջման ժամանակ չեն ունեցել։
«Ինչ վերաբերում է գրաֆիկին, մենք ստանդարտներ ունենք, թե որքան պետք է աշխատեն և հանգստանան բժիշկները։ Բողոքում են նրանք, ովքեր հիմնականում համատեղությամբ են աշխատում և ծառայությունում կես դրույք ունեն», – ասաց Ստեփանյանը։
Նշենք, որ «Շտապօգնություն» ՓԲԸ–ն գտնվում է քաղաքապետարանի ենթակայության տակ։ Ավելի վաղ ՀՀ առողջապահության նախարար Արսեն Թորոսյանը Facebook–ի իր էջում գրել էր շտապօգնության միասնական համակարգ ձևավորելու անհրաժեշտության մասին, որը կունենա կոնկրետ լիազորությունների և պարտականությունների շրջանակ, ինչպես նաև վերանայված չափանիշներով ծառայություններ։
Թորոսյանն ավելացրել էր, որ ծառայության բարեփոխման աշխատանքները մեկնարկել են դեռևս աշնան սկզբին, սակայն հիմա, բժիշկների դժգոհության պատճառով, այդ գործընթացը կարագանա։ Նրա խոսքով` բարեփոխումների ընթացքում հաշվի է առնվելու միջազգային փորձը, ինչպես նաև ծառայության աշխատակիցների որակավորումը։
