ԵՐԵՎԱՆ, 21 հունվար — Sputnik. Հայաստանի Հանրապետության վարչապետ Նիկոլ Փաշինյանը շնորհավորական ուղերձ է հղել Շվեդիայի Թագավորության վարչապետ Ստեֆան Լյովենին՝ Շվեդիայի վարչապետի պաշտոնում վերընտրվելու առթիվ:
Այս մասին տեղեկացնում են ՀՀ վարչապետի աշխատակազմից:
«Ջերմորեն շնորհավորում եմ Ձեզ Շվեդիայի Թագավորության վարչապետի պաշտոնում վերընտրվելու կապակցությամբ:
Հայաստանի նոր կառավարությունը մեծապես կարևորում է Շվեդիայի հետ երկկողմ և բազմակողմ ձևաչափերով համագործակցության շարունակական զարգացումը և պատրաստ է քննարկել այդ ուղղությամբ հետագա քայլերը։
Շվեդիան Հայաստանի կարևոր գործընկերներից է և մեր երկրում ընթացող ժողովրդավարական գործընթացների, ինչպես նաև Հայաստան-ԵՄ փոխգործակցության ակտիվ աջակիցը»,-նշված է ՀՀ վարչապետի շնորհավորական ուղերձում:
Նիկոլ Փաշինյանը հույս է հայտնել, որ համատեղ ջանքերով հայ-շվեդական հարաբերությունները կբարձրանան որակական նոր մակարդակի` ի շահ երկու ժողովուրդների:
