ԵՐԵՎԱՆ, 16 հունվարի — Sputnik. ՀՀ ավելի քան 100 հազար քաղաքացի վարակված են հեպատիտի տարբեր տեսակներով։
Այս մասին մամուլի ասուլիսի ժամանակ ասաց Հայկական լյարդաբանական ասոցիացիայի նախագահ Հասմիկ Ղազինյանը։
Հայաստանի գլխավոր լյարդաբանը նշել է, որ հանրապետության բնակչության մոտ 2% (մոտ 50–60 հազար մարդ) հեպատիտ B–ով են վարակված։ Ինչ վերաբերում է հեպատիտ C–ին, ապա վարակված է բնակչության մոտ 4-5% (60–80 հազար մարդ)։ Բոլոր այդ մարդիկ գիտեն իրենց ախտորոշման մասին։
Մինչդեռ միջազգային պրակտիկան ցույց է տալի, որ ընդհանուր առմամբ վարակվածների միայն 10% գիտեն դրա մասին, մնացած 90% պատահական ու տարբեր հանգամանքներում են տեղեկանում։
«Յուրաքանչյուր քսան վայրկյանի ընթացքում աշխարհում հեպատիտի վարակի նոր դեպք է գրանցվում։ Ու եթե 90–ականներին վարակման հիմնական պատճառը արյան փոխներարկումն էր, ապա հիմա իրավիճակն այլ է. դա թմրանյութերի ներարկումն է, սեռական կապերը, կոսմետիկ գործողություները», – նշեց Ղազինյանը։
Նա ավելացրեց, որ Հայաստանում վարակված քաղաքացիների թիվն աճում է, սակայն նա վիճակագրական հստակ թվեր չներկայացրեց։
Երկրի գլխավոր լյարդաբանը հայտնեց, որ Հայաստանում սքրինինգային ծրագրեր կիրականացվեն հոգեբուժարանների պացիենտների ու մաշկավեներական հիվանդություններ ունեցողների շարքում հիվանդությունը բացահայտելու նպատակով։ Նա նշեց, որ հանրապետությունը ձգտում է վերացնել վարակային հեպատիտը մինչ 2030 թվականը։
«Հեպատիտն ընդունված է անվանել «քնքուշ մարդասպան» ու կարևոր է հասկանալ, որ այդ հիվանդությունը դատավճիռ չէ։ Մենք անում ենք հնարավոր ամեն բան այն բուժելու համար։ Արտոնյալ ու անվճար բուժման ծրագրեր կան։ Կարևոր է ախոտորոշում անցնել, հայտնաբերել վարակն ու սկսել բուժումը», – ասաց Ղազինյանը։
Առողջապահության համաշխարհային կազմակերպության տվյալների համաձայն` B ու C վարկային հեպատիտ ունի ավելի քան 325 միլիոն մարդ։ Հենց B ու C հեպատիտներն են լյարդի քաղցկեղի հիմնական պատճառները, որից օրական աշխարհում 1,34 միլիոն մարդ է մահանում։
Քաղցկեղի դեպքերի 60%-ը կապված է հեպատիտի ուշ ախտորոշման հետ։ Առողջապահության համաշխարհային կազմակերպության կարծիքով` ամենամեծ բացթողումը թեստավորման ու բուժման ոչ բավարար տարածումն է, այդ խնդիրն անհրաժեշտ է լուծել մինչ 2030 թվականը։
