ԵՐԵՎԱՆ, 16 հունվարի — Sputnik. «Սուրբ Աստվածածին» բժշկական կենտրոնի տնօրեն Նիկոլայ Դալլաքյանը հերքել է տեղեկությունն այն մասին, որ հիվանդանոցում երկու երեխաների մահվան պատճառը H1N1 գրիպն է։
Ավելի վաղ ԶԼՄ–ներում տեղեկություն էր հայտնվել, որ երեխաները մահացել էին «А» տեսակի H1N1 գրիիպից։
Բժշկական կենտրոնի տնօրեն Նիկոլայ Դալլաքյանը Sputnik Արմենիայի թղթակցի հետ զրույցում հայտնել է, որ հունվարի 15–ին հիվանդանոցում իսկապես երկու երեխա է մահացել` 6 ամսական ու 12 տարեկան։ Սակայն այդ դեպքերը միմյանց հետ ոչ մի կապ չունեն ու ոչ մի կապ չունեն H1N1 գրիպի հետ։
«Այդ դեպքերը H1N1 գրիպի հետ կապելու համար պետք է հիվանդ երևակայություն ունենալ», – ընդգծել է Դալլաքյանը։
Նա ավելացրել է, որ մահացած երեխաները լուրջ քրոնիկական հիվանդություններ ունեին։
Նշենք, որ օրերս Հայաստանում գրանցվել է «А» տեսակի H1N1 գրիպի բարդացման հետևանքով մահվան երկրորդ դեպքը։ Մահացել է 62 տարեկան տղամարդ։ Ավելի վաղ հայտնել էին նաև կնոջ մահվան մասին։
Հունվարի 14-ի դրությամբ՝ պոլիկլինիկական ծառայության դիմել է սուր շնչառական վարակներով 1080 հիվանդ, ստացիոնարներում բուժում է ստանում 837 քաղաքացի, որոնց 95%-ը երեխաներ են:
