ԵՐԵՎԱՆ, 28 դեկտեմբերի — Sputnik. Մանբրիջում քուրդ զինյալների դեմ ռազմական գործողությունների ձեռնարկման մեր ծրագրերը չեն փոխվել։ Այսպես է մեկնաբանել Թուրքիայի նախագահ Ռեջեփ Թայիփ Էրդողանը սիրիական բանակի մուտքը Մանբիջ, հայտնում է RT-ն:
Սիրիական բանակի մուտքը քուրդ զինյալների վերահսկողության տակ գտնվող Մանբիջ Էրդողանն իրենց դեմ հոգեբանական ճնշման փորձ է անվանել:
«Մենք գիտենք, որ Դամասկոսը որոշակի հոգեբանական ճնշման փորձեր է անում: Այնտեղ հիմա Սիրիայի դրոշն է, բայց լուրջ ոչինչ չկա: Վաղը Թուրքիայի արտգործնախարարը, պաշտպանության նախարարն ու հետախուզական կոմիտեի ղեկավարը մեկնելու են Մոսկվա, այնտեղ մանրամասն կքննարկեն այդ թեմաները: Դրանից հետո հեռախոսով, հնարավոր է նաև Մոսկվայում կամ Սոչիում քննարկումներ ունենամ Վլադիմիր Պուտինի հետ»,- ասել է Էրդողանը՝ հավելելով, թե իրենք դեմ են Սիրիայի մասնատմանը, իրենց նպատակն Սիրիայի հյուսիսում գտնվող քրդական ազգային զինված ջոկատներն են (PYD/YPG):
Այսօր Սիրիայի ԶՈւ ԳՇ-ից հայտնել են, որ, արձագանքելով Մանբիջի բնակչության կոչին, սիրիական բանակը մտել է Մանբիջ ու այնտեղ բարձրացրել Սիրիայի Արաբական Հանրապետության դրոշը:
