ԵՐԵՎԱՆ, 25 դեկտեմբերի — Sputnik. ՀՀ ֆինանսների նախարարությունը ստուգումներ կիրականացնի «Հարավկովկասյան երկաթուղի» ՓԲԸ–ում։ ՀՀ քննչական կոմիտեից հայտնում են, որ նման որոշում է կայացվել քրեական գործի նախաքննության շրջանակում` երևան եկած մի շարք հանգամանքներ պարզելու նպատակով։
Ֆինանսաբյուջետային վերահսկողության տեսչության մասնագետներին հանձնարարվել է ստուգել «Հարավկովկասյան երկաթուղու» 2008-2018թթ. ֆինանսական փաստաթղթերը։
Քննչական կոմիտեն նաև գործի ընթացքում բացահայտված մի քանի նոր փաստեր է հրապարակել։ Այսպես` պարզվել է, որ ՀԿԵ «Սովետական» և «Եղվարդ» քարշային ենթակայանների ուժային տրանսֆորմատորներից հափշտակվել են մետաղյա փաթույթներ: Հափշտակությունները կատարել են երկաթուղու աշխատակիցները։
Մեկ դեպքով ընկերության իրավասու անձինք նույնիսկ իմացել են իրենց ենթակա աշխատակցի կատարած հափշտակության մասին և նրանից պահանջել ու ստացել են առևտրային կաշառք՝ հափշտակությունը քողարկելու և դրան իրավական ընթացք չտալու համար:
Հափշտակություն կատարած, կաշառք պահանջած և տված անձանց առաջադրվել են մեղադրանքներ:
Նախաքննությունը շարունակվում է։ Քրեական գործով քննության առարկա է հանդիսանում «Հարավկովկասյան երկաթուղու» 10 տարվա գործունեությունը, ստուգվում է շուրջ 110 մլրդ ՀՀ դրամի ներդրումների արդյունավետությունն ու իրավաչափությունը։
Հիշեցնենք` մինչ այդ նախաքննական մարմինն արդեն հայտարարել էր, որ քրեական գործով տվյալներ են ձեռք բերվել նաև ՀՀ տրանսպորտի, կապի և տեղեկատվական տեխնոլոգիաների նախարարի տեղակալի կողմից պաշտոնեական լիազորություններն առերևույթ չարաշահելու վերաբերյալ, ինչի առթիվ հարուցվել է նոր քրեական գործ և ուղարկվել ՀՀ հատուկ քննչական ծառայություն։
Ըստ գործի նյութերի` «Հարավկովկասյան երկաթուղին» «Ռուսական երկաթուղիներ» ԲԲԸ–ին փոխանցելու մասին ՀՀ կառավարության հետ 2008թ-ին կնքված պայմանագրով ՀՀ տրանսպորտի և կապի նախարարությանը իրավունք է վերապահվել տարին մեկ անգամ ուսումնասիրություններ կատարել` պարզելու պայմանագրի պայմանների և կատարման ընթացքը։
Այդ նպատակով նախարարության և աուդիոտարական ընկերության միջև կնքվել է աուդիտորական ծառայությունների մատուցման պայմանագիր՝ 40.020.000 ՀՀ դրամ արժեքով։
2015թ. փետրվարին կատարված աուդիտի արդյունքում արձանագրվել են ֆինանսական բնույթի մի շարք չարաշահումներ, այդ թվում՝ երկաթուղային ենթակառուցվածքներում 428 միլիոն ՀՀ դրամի չկատարված շինարարական աշխատանքներ:
Այդ աշխատանքները համակարգող ՀՀ տրանսպորտի և կապի նախարարի տեղակալը հայտնաբերված չարաշահումների մասին հաղորդում չի ներկայացրել ՀՀ իրավապահ մարմիններին,ինչի արդյունքում միջոցներ ձեռք չեն առնվել «Հարավկովկասյան երկաթուղուն» ստանձնած պարտավորությունները կատարելուն պարտավորեցնելու ուղղությամբ։
2008թ. փետրվարի 13-ին ՀՀ կառավարության և «Ռուսական Երկաթուղիներ» ԲԲԸ միջև կնքված կոնցեսիոն պայմանագրով ՀՀ երկաթուղային ենթակառուցվածքը 30 տարի ժամկետով հանձնվել է «Ռուսական Երկաթուղիների» կառավարմանը, որի դիմաց ընկերությունը պարտավորվել է 122 մլրդ 348 մլն ՀՀ դրամ ներդրում կատարել երկաթուղային ենթակառուցվածքներում և 52մլրդ 209 մլն դրամ` շարժակազմերում։
Նշենք, որ մամուլում առկա տեղեկություններով, գործով կասկածվողը ՀՀ տրանսպորտի, կապի և տեղեկատվական տեխնոլոգիաների նախարարի նախկին տեղակալ Արթուր Առաքելյանն է։
