ԵՐԵՎԱՆ, 10 սեպտեմբերի — Sputnik. «Հարավկովկասյան երկաթուղի» (ՀԿԵ) ՓԲԸ-ում չարաշահումները կազմել են մոտ 60 մլն դոլար` մամուլում շրջանառվող 19 հազարի փոխարեն։ Այս մասին «Կոմերսանտ» թերթին տված հարցազրույցում հայտնել է ՀՀ վարչապետ Նիկոլ Փաշինյանը` պատասխանելով «Ռուսական երկաթուղիներ» ընկերության հայկական մասնաճյուղում իրականացված խուզարկությանը վերաբերող հարցին։
«Քննչական մարմինը հետաքննություն է իրականացնում, և մոտ ապագայում պաշտոնական տեղեկություն կլինի։ Այն, ինչ ասում եմ, կարող եք պաշտոնական տեղեկություն համարել», — ընդգծել է վարչապետը։
«Հարավկովկասյան երկաթուղի» ՓԲԸ-ի գրասենյակում օգոստոսի 14-ի լույս 15-ի գիշերը խուզարկություն է տեղի ունեցել, այն իրականացնում էին ՀՀ ՊԵԿ աշխատակիցները։ Փաստաթղթեր են առգրավվել։ Գործողություններին ներգրավվել են նաև հատուկ նշանակության զորքերը։
Փաշինյանը պարբերականի հետ զրույցում հաստատել է, որ Ռուսաստանի նախագահի հետ հանդիպման ժամանակ քննարկել են նաև ՀԿԵ-ում իրականացրած խուզարկության թեման։ Ռուս առաջնորդը, ըստ ՀՀ վարչապետի, հայկական կառավարությանը լիովին սատարում է կոռուպցիայի դեմ պայքարի հարցում։
«Մենք համագործակցելու ենք և՛ այս ոլորտում, և՛ մյուս ոլորտներում, որպեսզի Հայաստանում գործող ռուսական ընկերություններում չարաշահումներ չլինեն։ Մենք պայմանավորվել ենք, որ այն, ինչ վերաբերում է օրինականությանը, կոռուպցիայի դեմ պայքարին, որևէ կերպ չի կարող մեկնաբանվել որպես հակառուսական գործողություն», — ընդգծել է Փաշինյանը։
«ՀԿԵ»-ն («Ռուսական երկաթուղիների» դուստր ընկերություն) Հայաստանի երկաթուղու կոնցեսիոներն է։
