ԵՐԵՎԱՆ, 21 դեկտեմբերի — Sputnik. Երևանի քաղաքապետարանի ծախսերը եկող տարում կօպտիմալացվեն 4,5 միլիարդ դրամով։ Այս մասին այսօր մամուլի ասուլիսի ժամանակ հայտնեց փոխքաղաքապետ Հայկ Սարգսյանը։ Նրա խոսքով` սա սխալ է հետընթաց որակել։
Երևանի քաղաքապետարանի` օրերս հրապարակված բյուջեի նախագիծը հասարակության շրջանում բուռն քննադատություն առաջացրեց։ Նախագիծը ծախսերի կրճատում է ենթադրում այնպիսի առանցքային ոլորտներում ինչպիսին է տրանսպորտը, վերելակների սպասարկումը, փողոցների լուսավորությունը, բնակելի տարածքների շինարարությունն ու կոմունալ ծառայությունները։
Ծախսերի նման կտրուկ փոփոխությունը, փոխքաղաքապետի խոսքով, կապված է անձնակազմի լիարժեք վերապատրաստման անհրաժեշտության հետ։ Հավանաբար, քաղաքապետարանում գտել են, որ մայրաքաղաքի բազմաթիվ խնդիրները կապված են կառավարչական ճգնաժամի հետ։
Սարգսյանն այսօր փորձեց պարզաբանել իրավիճակը. նախևառաջ 2019 թվականի բյուջեն նախորդ տարվա բյուջեի համեմատ 2 միլիարդ դրամ ավել գումար ունի։
«Դա բավականին համեստ պլանավորում է, քանի որ բյուջեի վերաբերյալ տեսլականն ավելի մեծ է, քան արձանագրված է նախագծում։ Այնուամենայնիվ, ծախսերը պլանավորվել են առանց հաշվի առնելու կողմնակի եկամուտները» , – ասաց նա։
Անդրադառնալով տրանսպորտի ծախսերի կրճատմանը` Սարգսյանը նշեց, որ այդ փոփոխությունները չեն հանգեցնի սպասարկման վատացմանը։ Ծախսերի կրճատումը տեղի է ունեցել մետրոպոլիտենի վարկային ծրագրի կրճատման հաշվին։
Նա ասաց, որ քաղաքապետարանը հիմա աշխատում է տրանսպորտի փոփոխման ծրագրի վրա։ Այս ծրագիրը պատրաստել է բրիտանական WYG ընկերությունը։ Ծրագրի մշակումն ավարտին է մոտենում, սակայն մայրաքաղաքի իշխանության համար որոշ դրույթներն անընդունելի են։ Նրանք ընկերությանը լրացուցիչ ժամանակ են տվել որոշ կետերը վերանայելու համար։ Ընկերության ներկայացուցիչների հետ վերջին հանդիպումը նախորդ շաբաթ է եղել։ Տարաձայնությունները կապված են ուղևորահոսքի ծավալների գնահատման ու տոմսի արժեքի հաշվարկի հետ։
«Չենք ստորագրի ծրագիրը, քանի դեռ պայմանները չեն բավարարում մեզ։ Մինչ 2019 թվականի հունվարի վերջ քաղաքապետարանը կստանա ծրագրի շտկված տարբերակը», – խոստացավ նա։
Պաշտոնյան ավելացրեց, որ անհնար է մեկ տարում լուծել 1,2 միլիոն բնակիչ ունեցող քաղաքի տրանսպորտային խնդիրը։
Ինչ վերաբերում է վերանորոգման ծախսերին ու վերելակների վերանորոգմանը` նա նշեց, որ դրանց սպասարկման աշխատանքները չեն պակասում։ Պարզապես քաղաքապետարանում որոշել են, որ աշխատանքների անհրաժեշտ ծավալը կարելի է ավելի քիչ գումարով
Անդրադառնալով քաղաքապետարանի աշխատակիցների վերապատրաստման համար տրամադրվող գումարին`Սարգսյանն ասաց, որ վերապատրաստումները նախկինում էլ են եղել։
«Ձեզ դուր է գալիս` ինչպե՞ս է մայրաքաղաքը կառավարվում։ Ձեզ դու՞ր է գալիս մեր քաղաքի վիճակը։ Եթե ոչ, ապա ինչու է վերապատրաստումն այդքան հարցեր առաջացնում», – դիմեց նա ներկաներին։
Եկող տարում կավելանան նաև պարգևները, դրամային խրախուսանքներն ու հատուկ վճարումները, դրանք 758,5 միլիոնի փոխարեն կկազմեն գրեթե երկու միլիոն դրամ։ Դա արվում է քաղաքապետարանի աշխատակիցներին խրախուսելու համար։
