ԵՐԵՎԱՆ, 21 դեկտեմբերի — Sputnik. «3 ամսվա մեր համատեղ աշխատանքի ընթացքում ակնկալիքները շատ ավելի մեծ են եղել Ձեր աշխատանքից: Այս ընթացքում ծագել են մի շարք սկզբունքային հարցեր, որոնց Դուք այդպես էլ լուծում չեք տվել»։ Այս մասին Երևանի ավագանու այսօրվա նիստում հայտարարեց «Լույս» խմբակցության անդամ Անի Սամսոնյանը` հավելով, որ եկել է քաղաքապետին տոնածառի հանդեսից մի քիչ շեղելու։
«Դուք խայտառակ եղաք, պարո՛ն Մարության: 2 նամակ եմ գրել այս ընթացքում և երկուսի դեպքում էլ ստացել եմ անհասկանալի պատասխաններ»,–տեղեկացրեց ավագանու անդամը:
Առաջին նամակով Անի Սամսոնյանը խնդրել էր համատեղ հանդիպում կազմակերպել կրթության և գիտության նախարարի, իր և այն ուսուցիչների միջև, որոնք անարդարացիորեն նվաստացվել և վիրավորվել են քաղաքապետարանի հանրակրթության վարչության պետից:
«Այստեղ ելույթ ունեցա, հարց բարձրացրի, որ Դուք պետք է հեռացնեք այդ անէթիկա պաշտոնյային, բայց նա մինչև հիմա չի հեռացվել: Եվ իմ բերած փաստերին ոչ մի հակափաստարկ չի բերվել: Ինչո՞ւ չեք հեռացնում Աննա Ստեփանյանին»,- հարցրեց նա:
Ապա Ավագանու անդամը նկատեց, որ «Իմ քայլը» դաշինքի նախընտրական ծրագրում տեղ էր գտել աղբահանության երկրորդ օպերատորին ներգրավելու կետը:
««Սանիտեկի» հարցը չի լուծվում: Ես այն եզրահանգմանն եմ գալիս, որ Դուք չգիտեք՝ ինչպես լուծել այդ խնդիրը և անկարող եք քաղաքը մաքրել աղբից: Բոլոր քաղաքացիներին կոչ եմ անում ֆլեշմոբ անել: Ձեր անձնական և գործնական էջերին ամեն առավոտ, ամեն երեկո ուղարկել աղբի նկարներ: Դուք պետք է արթնանաք և քնեք աղբի նկարներով»,- ասաց Անի Սամսոնյանը:
