ԵՐԵՎԱՆ, 21 դեկտեմբերի — Sputnik. Ռոսկոմնադզորը սկսում է ստուգումներ իրականացնել Ռուսաստանի տարածքում հեռարձակվող BBC World News հեռուստաալիքում, ինչպես նաև BBC առցանց ռեսուրսներում։ Կստուգվի թողարկվող նյութերի համապատասխանելիությունը Ռուսաստանի օրենսդրությանը ` RT–ի նկատմամբ Ofcom բրիտանական ընկերության որոշումից հետո, հայտնել է գերատեսչության մամուլի ծառայությունը։
«RT հեռուստաալիքի կողմից հեռարձակման կանոնները խախտելու մասին Ofcom բրիտանական ընկերության որոշումից հետո Ռոսկոմնադզորը սկսում է ստուգիչ միջոցառումներ իրականացնել ՌԴ տարածքում հեռարձակվող BBC World News հեռուստաալիքի, ինչպես նաև համացանցում BBC ռեսուրսների նկատմամբ` Ռուսաստանի օրենսդրությանը` թողարկվող նյութերի համապատասխանելիությունը ստուգելու համար», – գրված է հաղորդագրության մեջ։
Ստուգումների արդյունքների մասին կհայտնեն լրացուցիչ։ Ինչպես հայտնել է Ռոսկոմնադզորի մամուլի քարտուղար Վադիմ Ամպելոնսկին, BBC World News հեռուստաալիքի ստուգումները կսկսվեն արդեն այսօր։ Սակայն որքան կտևեն, չեն հայտնում։
Նախօրեին բրիտանական Ofcom մեդիակարգավորող ընկերությունը հայտարարել էր, որ RT հեռուստաալիքի գործողություններում կանոնների խախտում է նկատել։ Գործակալությունը նշում է, որ Ofcom–ի տվյալներով` հեռուստաալիքն 2018 թվականի գարնանը` 6 ամսվա ընթացքում այդ կանոնները 7 անգամ խախտել է։ Հեռուստաալիքի դեմ կարող են մի շարք միջոցներ ձեռնարկել, այդ թվում 250 հազար ֆունտ ստեռլինգի չափով տուգանք կիրառել կամ հետ կանչել արտոնագիրը։
RT –ի գլխավոր խմբագիր Մարգարիտա Սիմոնյանն իր տելեգրամ–ալիքում ներկայացրել է որոշ խախտումների անհեթեթությունը։
«1. Բրիտանական Ofcom–ը կարծում է, որ RT–ն խախտել է հեռարձակման կանոնները, քանի որ եթեր է տվել և «կասկածի տակ չի դրել» Սիրիայի վերաբերյալ ՌԴ ՊՆ հայտարարությունները։
2. Բրիտանական Ofcom–ը հեռարձակման կանոնների խախտում է համարում այն փաստը, որ մեր հաղորդավարը եթերում ընդհատել է Սիրիայում ԱՄՆ նախկին դեսպանին։
3. Ուկրաինայում գնչուական կոտորածի մասին սյուժեում Ofcom–ը ջարդարարների դիրքորոշման ոչ բավարար լուսաբանում է տեսել։ Այն ներկայացվել էր մեր կողմից, սակայն, ուփս` ոչ բավարար։
Ինչպես նաև պատմել ենք SS «Գալիչինի» դիվիզիայի պատվին անցկացվող մանկական նկարների մրցույթի մասին և «այլընտրանքային տեսակետ չենք ներկայացրել»։ Այսինքն` պետք է, ենթադրել`SS-ի տեսակետը։
Կատակ չեմ անում»։
