ԵՐԵՎԱՆ, 18 դեկտեմբերի — Sputnik. Թուրքիայում ռազմական հեղաշրջման փորձին առնչություն ունենալու մեղադրանքով դատապարտվել է 3057 մարդ։
Ինչպես տեղեկացնում է ermenihaber.am–ը, Թուրքիայում դեռ շարունակվում են հեղաշրջման փորձի գործով կալանավորված մարդկանց դատավարությունները։ 2016թ-ից մինչ օրս բացվել է 289 վարույթ, որից 239-ն արդեն ավարտվել են։ Այդ դատական որոշումներից 34-ը կայացվել է Անկարայում, իսկ 46-ը՝ Ստամբուլում։
Ընդհանուր առմամբ՝ ռազմական հեղաշրջման փորձին առնչություն ունենալու մեղադրանքով դատապարտվել է 3057 մարդ, որից 1934-ը՝ ցմահ ազատազրկման։ Նրանցից 956-ն իրենց պատիժը կրելու են խստացված ռեժիմով կալանավայրում:
Գյուլենական շարժման դեմ պայքարի շրջանակներում, մինչ օրս Թուրքիայի զինված ուժերից հեռացվել է 15,153 զինվորական։
Հիշեցնենք, որ 2016թ. հուլիսի 15-ի ուշ երեկոյան Թուրքիայում ռազմական ճանապարհով պետական հեղաշրջման փորձ էր կատարվել, որը, սակայն, հուլիսի 16-ի դրությամբ արդեն լիովին ճնշվել էր: Օդուժի կիրառմամբ իրագործված հեղաշրջման փորձի հետևանքով, ըստ պաշտոնական տվյալների, զոհվել է 248 և վիրավորվել 2196 մարդ:
