ԵՐԵՎԱՆ, 28 նոյեմբերի — Sputnik. Ռոբերտ Քոչարյանի անմեղության կանխավարկածի և պաշտպանության իրավունքի խախտման հարցերով բողոքը Եվրոպական դատարան դեռ չի հասել։ Այսօր այս մասին լրագրողներին հայտնեց ՄԻԵԴ–ում ՀՀ դատավոր, ՀՀ մարդու իրավունքների նախկին պաշտպան Արմեն Հարությունյանը։
«Ես ոչ փաստաբանն եմ այդ հարցով, ոչ մեղադրողն եմ։ Այդ գործը դատարան չի հասել»,– ի պատասխան լրագրողների հարցերի` ասաց Հարությունյանը` հրաժարվելով մեկնաբանել ՀՀ երկրորդ նախագահի նկատմամբ հարուցված գործի և նրա նկատմամբ ընտրված խափանման միջոցների վերաբերյալ որոշումները։
Լրագրողների հիշեցմանը, թե 2008թ–ին ՄԻՊ–ի պաշտոնում ինքը մարտի 1-ի վերաբերյալ արտահերթ զեկույց էր հրապարակել, որտեղ բավական կոշտ գնահատականներ էր տվել տեղի ունեցած իրադարձություններին, Հարությունյանն ասաց, որ իր տեսակետը չի փոխվել։ Այդուհանդերձ, 10 տարի անց, արդեն եվրոպական դատավորի կարգավիճակում Արմեն Հարությունյանը հրաժարվեց մարտի 1-ի վերաբերյալ որևէ տեսակետ հայտնել։
«Եթե մարդու իրավունքների պաշտպան ես, դա մի կարգավիճակ է,եթե եվրոպական դատարանի դատավոր, դա մի այլ կարգավիճակ է»,– ասաց նա` հավելելով, որ այս Մարտի 1-ի գործով ՄԻԵԴ վճռի հիմքում նաև այդ արտահերթ զեկույցն է դրված։
Հարությունյանն ասաց, որ մարտի 1-ին առնչվող գործերով եվրոպական դատարանի նիստերին ինքը նույնիսկ չի մասնակցում, քանի որ ժամանակին զբաղվել է այդ գործով ու հիմա արդեն շահագրգիռ անձ է համարվում։
«Դուք ինձ տալիս եք քաղաքական հարցեր, որոնք հետագայում կարող են օգտագործվել իմ դեմ եվրոպական դատարանում»,– ասաց Հարությունյանը։
Հիշեցնենք` ՀՀ երկրորդ նախագահ Ռոբերտ Քոչարյանի փաստաբանական թիմը նոյեմբերի 10-ին հայտարարել էր, որ անմեղության կանխավարկածի, ինչպես նաև պաշտպանության իրավունքի խախտման հարցով դիմել է ՄԻԵԴ:
Հիշեցնենք նաև, որ Քոչարյանը հուլիսին Հատուկ քննչական ծառայություն էր ներկայացել վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1 հոդվածի 1-ին մասով։ Նա մեղադրվում է այլ անձանց հետ նախնական համաձայնությամբ Հայաստանի Հանրապետության սահմանադրական կարգը տապալելու մեջ:
Առաջին ատյանի դատարանը Քոչարյանին կալանավորելու միջնորդությունը բավարարել էր, իսկ Վերաքննիչ դատարանը նրան ճանաչել է անձեռնմխելի, և Քոչարյանն ազատ էր արձակվել կալանքից: Ավելի ուշ ՀՔԾ-ն նրա նկատմամբ խափանման միջոց է ընտրել ստորագրություն չհեռանալու մասին:
