ԵՐԵՎԱՆ, 27 նոյեմբերի — Sputnik. Գյումրիում նոյեմբերի 27-ին կայացած հանդիպման ժամանակ ՀՀ ոստիկանապետ Վալերի Օսիպյանը փաստեց՝ ոստիկանությունն ու անձամբ ինքը՝ կաշկանդված չէ:
«Եթե մտածում են, որ ոստիկանությունը կաշկանդված է, ո՛չ, այսօր որևէ մեկը ոստիկանությունում կաշկանդված չէ, եթե կա նման մեկը՝ լինի շարքային, թե գնդապետ, մեր շարքերում տեղ չունի: Ինչի՞ց պիտի կաշկանդվի գնդապետ Օսիպյանը, չեմ կաշկանդվել, չեմ կաշկանդվում, չեմ էլ պատրաստվում կաշկանդված լինել, ոչ էլ որևէ մեկից կախված եմ: Այս ամիսների ընթացքում չար ուժեր փորձում են տարբեր ձևի ցեխ շպրտել թե՛ ինձ վրա, թե՛ ինձ վստահված ողջ համակարգի վրա: ՀՀ յուրաքանչյուր քաղաքացի այսօր պաշտպանված է, վստահեցնում եմ , և ոստիկանությունը ուժեղ է: Ոստիկանությունը ձերն է, այսօր մենք ծառայում ենք օրենքին, ծառայում ենք ձեզ: Մենք բոլորի ոստիկանությունն ենք, մենք չենք ասում սրա, նրա, մեկը, մյուսի ոստիկանությունն ենք, մենք պաշտպանն ենք բոլորի, պարտավոր ենք ապահովել բոլորի անվտանգությունը»:
Ոստիկանապետ հաստատեց՝ ոստիկանությունը քարոզարշավի և ընտրությունների ընթացքում լինելու է զգոն՝ արձագանքելով ցանկացած ահազանգի:
Կարևորելով արտահերթ ընտրությունների քարոզարշավի, ինչպես նաև ընտրությունների հարթ ընթացքը, ՀՀ ոստիկանապետը նշել է, որ ոստիկանությունը լինելու է աննախադեպ զգոն և արձագանքելու է ցանկացած փոքրիկ ահազանգի, հետևողական աշխատանք է տարվելու: «ՀՀ վարչապետը ոստիկանության առաջ խնդիր է դրել՝ ոստիկանությունը պետք է ապահովի բոլորի հավասարությունը օրենքի առջև, յուրաքանչյուր կուսակցության, թեկնածուի և քաղաքացու քայլ պետք է բխի օրենքից»,-հանդիպման ժամանակ նշեց ՀՀ ոստիկանապետը՝ շեշտելով, որ բարձր մակարդակի ընտրություններ ունենալու համար հայցում է բոլորի աջակցությունը:
Օսիպյանը հորդորեց բոլորին զերծ մնալ ցանկացած խախտումից ու օրինազանցությունից:
Ոստիկանապետը վստահեցրեց՝ կպատժվեն բոլորը, անկախ նրանից, թե ով է ընտրակեղծարարը, և ոստիկանության մոտեցումը շատ խիստ է լինելու թե՛ կաշառք տվողի, թե՛ կաշառք վերցնողի հանդեպ:
«Կաշառքը պայմանավորված չէ միայն թղթադրամով, կաշառքի տարբեր ձևեր կան, անգամ ընտրախոստումը համարում ենք կաշառք, գյուղմթերքով, բնամթերքով, շինանյութով, ուսման վարձ վճարելով և այլն: Նմանատիպ ցանկացած տեսակի ընտրակաշառքի դրսևորման նկատմամբ ոստիկանության մոտեցումը լինելու է շատ խիստ և չենք հանդուրժելու որևէ նման դրսևորում: Անթույլատրելի եմ համարում որևէ հանցավոր տարրի, այսպես ասած, կրմինալի ազդեցությունը ընտրությունների վրա»,- ասաց Վալերի Օսիպյանը՝ փաստելով, որ ոստիկանությունը տիրապետում է օպերատիվ իրավիճակին, իրենց տեսադաշտում են նրանք, որոնք կարող են զբաղվել ընտրակաշառքների բաժանմամբ, ընտրակեղծիքներով ստվեր գցել ընտրությունների վրա, սակայն, միայն իրենց իմանալը քիչ է, անհրաժեշտ է, որ թեկնածուներն էլ համագործակցեն իրենց հետ, եթե նման դեպքեր արձանագրվեն:
