ԵՐԵՎԱՆ, 27 նոյեմբերի — Sputnik. «Բարգավաճ Հայաստան» կուսակցությունը պատասխաններ ունի բոլոր հարցերին ու խնդիրներին, որոնց հետ հիմա բախվում են երկրի քաղաքացիները։ Այդ մասին ասաց կուսակցության առաջնորդ, խոշոր գործարար Գագիկ Ծառուկյանը Աբովյան քաղաքի բնակիչների հետ հանդիպմանը։
«Խնդիրներ կան երկրի կյանքի բոլոր ոլորտներում։ ԲՀԿ–ն ունի իր ծրագիրը, նա պատրաստ է առաջարկել այդ խնդիրների լուծումները։ Մենք ցանկանում ենք նպաստել, որ քաղաքացիները դուրս գան պարտքերի փոսից, որպեսզի մարդիկ կարողանան նայել իրենց երեխաների աչքերին, կարողանան նրանց համար ապահովել արժանավայել կենսամակարդակ», – ասաց նա։
Ծառուկյանը խնդիրներից մեկը համարում է բանկային վարկերի բարձր տոկոսադրույքները։ Նրա խոսքով` բանկային տոկոսները չեն կարող սկսվել 8 տոկոսից, եթե միջին տարեկան շահույթը կազմում է 7 տոկոսից ոչ ավելի։
«Մարդիկ ստիպված են վարկեր վերցնում, այլ ոչ թե լավ կյանքից։ Չի կարող տարեկան շահույթը լինել 7 տոկոս, իսկ բանկային տոկոսադրույքները` 8 տոկոս կամ 12 տոկոս։ Բանկային տոկոսադրույքները պետք է կազմեն 3,5 տոկոս` տարեկան շահույթի կեսի չափով», – ասաց Ծառուկյանը։
Կուսակցության առաջնորդը կարծում է, որ պետք է զարգացնել փոքր և միջին բիզնեսը։ ՓՄՁ–ն պետության ողնաշարն է։ Պետք է նաև պայմաններ ապահովել նոր ներդրումների հոսքի համար։ Ոչ մի ներդրող չի գա, քանի հարկային դաշտը բարելավված չէ։ Հայաստանի փոխարեն կընտրեն, օրինակ, Վրաստանը։
Գործարարը հավաստիացրեց, որ իր հնարավորությունների սահմաններում պատրաստ է ամեն ինչ անել ընթացիկ խնդիրների լուծման համար։
«Հարվարդը չեմ ավարտել, բայց գործունեության հարուստ փորձ ունեմ։ Տիրապետում եմ բոլոր ոլորտներին, տեղյակ եմ բնակչության բոլոր խավերի խնդիրներից», – ասաց նա։
Ծառուկյանը պատրաստ է օգտագործել իր անձնական կապերը ներդրումներ գրավելու համար։ Ծառուկյանը ցանկանում է ուժեղացնել Հայաստանը, ապահովել Արցախի անվտանգությունը։ Նա համոզված է, որ բանակցություններ են վարում միայն ուժեղների հետ, «թույլերի հետ խոսակցությունը կարճ է»։
Խոսելով Փաշինյանի մասին` գործարարն ասաց, որ նրա համար հիմա շատ դժվար է։
Վարչապետի պաշտոնակատարը կարող է քաղաքական փոփոխություններ իրագործել երկրում, բայց հսկայական աշխատանք պետք է կատարել։ Այդ աշխատանքը պահանջում է հմտություններ և փորձ։ Ծառուկյանի կարծիքով` կարելի է հիանալի հռետոր լինել, բայց դա քիչ է։
Այնուհետև Ծառուկյանն առաջարկեց շարունակել հարց ու պատասխանի ձևաչափը։ Սակայն սկսեցին նրան դիմել հիմնականում անձնական հարցերով ու կարիքներով։ Ծառուկյանը մի քանի անգամ կոչ արեց քաղաքական հարցեր տալ, բայց ապարդյուն։
