ԵՐԵՎԱՆ, 25 նոյեմբերի — Sputnik. ՀՀԿ մամուլի խոսնակ ԱԺ փոխնախագահ Էդուարդ Շարմազանովը ֆեյսբուքյան ուղիղ հեռարձակմամբ ներկայացրել է այն ամենն, ինչ իրենց մտահոգելու տեղիք է տալիս և կոչով դիմել ՀՀ վարչապետի պաշտոնակատար Նիկոլ Փաշինյանին։
«Չնայած որոշ մարդիկ մեզ առաջարկում են սառը ցնցուղ ընդունել, բայց ես կարծում եմ, որ մենք ազգովի սառը ցնցուղ կընդունենք այն ժամանակ, երբ իմ մտահոգությունները կփարատվեն։ Նիկոլ Փաշինյանին էլ խորհուրդ չեմ տա սառը ցնցուղ ընդունել, որովհետև կարող է գրիպ ընկնի, և թիմն անօգնական մնա ու որևէ բան չկարողան անել։ Էս դեպի ձմեռ գնացող ճանապարհին, թեյ խմեք»,–ի պատասխան Նիկոլ Փաշինյանի` մտահոգներին խորհուրդ եմ տալիս սառը ցնցուղ ընդունել առաջարկի ասել է Շարմազանովը։
Նա ընդգծել է, որ իր մտահոգությունը նոր չէ, որ ինքը մտահոգ է եղել և՛ 10 տարի առաջ, և՛ 5 տարի առաջ, և՛ այսօր։ «Բայց եթե տարիներ առաջ մտահոգ էի, որովհետև ունեի մեծ պատասխանատվություն, և մեզանից շատ մեծ սպասելիք կար, որոնց մի մասն արդարացվել է, մի մասը` ոչ, ապա այսօր մտահոգ եմ, որովհետև այս 7 ամիսների ընթացքում տեսնում եմ լուրջ մարտահրավերներ մեր պետության, մեր ազգի, մեր հոգևոր ու ազգային արժեքների նկատմամբ` բանակի կամ հերոսների նկատմամբ հակաքարոզ, սեռական փոքրամասնությունների քարոզ, քաղաքական մերժողականության հստակ դրսևորումներ, նոր Հայաստանի հռչակումներ։
Ի՞նչ նոր Հայաստան հռչակում եք, որ ասեք` ձեզանից առաջ ոչ մի լավ բան չի եղել։ Ձեր նշած նոր Հայաստանում որևէ լուրջ զենքի մատականում ՀՀ բանակին չի եղել։ Սա մտահոգվելո՞ւ առիթ է տալիս, թե՞ երջանկանալու»,–ասում է ՀՀԿ–ական պատգամավորն ու հիշեցնում նաև գնաճի մասին։ «Մտահոգվելու չի, որ առաջին անհրաժեշտության ապրանքները մայիսից այս կողմ մի քանի անգամ թանկացել են, թե՞ մեր ժողովուրդը մենակ բանան է ուտում»,–նշում է նա` ի նկատի ունենալով բանանի գնի անկումը։ Շարմազանովի խոսքով` անգամ մարդկանց մեջ հումոր կա, թե Ամանորից հետո սառնարանում միայն «դուխով» գլխարկ կգտնեք, ««Դուխով» գլխարկով ազգին չես կերակրի, պարոն վարչապետ»,–ասում է Էդուարդ Շարմազանովը։
Հիշեցնենք, որ նոյեմբերի 24–ի Նիկոլ Փաշինյանի նախաձեռնած երթին քաղաքացիների քիչ մասնակցությունը մեկնաբանությունների տեղիք էր տվել, ինչին ի պատասխան ՀՀ վարչապետի պաշտոնակատարը «մտահոգներին խորհուրդ էր տվել սառը ցնցուղ ընդունել։
