ԵՐԵՎԱՆ, 24 նոյեմբերի — Sputnik. Հայաստանցի արտահանողները դեռ դժվարություններ ունեն ռուսաստանյան առաքումների հարցում։ Հայաստանի Տնտեսական մրցակցության պաշտպանության պետական հանձնաժողովի նախագահ Արտակ Շաբոյանն այս մասին խոսեց այսօր հրավիրված ասուլիսի ժամանակ։
Նա հիշեցրեց, որ ավելի վաղ հայկական ընկերությունները բողոքել էին ռուսական առևտրի ցանցերի հետ աշխատելու բարդություններից։ Բայց ՏՄՊՊՀ աջակցությամբ վերջին երկու տարիներին նրանք մի քանի անգամ հանդիպել են ռուսական խոշոր ցանցերի մենեջերների հետ։
Արդյունքում հայկական ընկերություններին մանրամասն ներկայացրել են, թե որակի ինչպիսի չափանիշներ պետք է ունենալ, որպեսզի նրանց արտադրանքը հայտնվի սուպերմարկետների դարակներում։ Հայկական ընկերությունները դժգոհ են եղել, որ իրենցից դեպոզիտներ են պահանջում ապրանքի պրոմո–ակցիայի համար։ Ռուս մենեջերների փաստարկները հանգել են հետևյալին․ ապրանքը պետք է լավ իմանան, այլապես այն ավելի քիչ կգնեն։ Եթե չգնեն, սուպերմարկետում շրջանառությունն ավելի քիչ կլինի։
Բացի այդ, ռուսական սուպերմարկետները պահանջում են գնումների մեծ ծավալներ։ Եթե նրանք վերցնում են ապրանքը, ապա այն պետք է ներկայացված լինի տվյալ ցանցի բոլոր կամ գրեթե բոլոր խանութներում։ Իսկ հայկական ոչ բոլոր ընկերությունները կարող են նման ծավալ ապահովել։
Որպես այլընտրանք՝ նրանց առաջարկում են մարզերի առևտրի ցանցերը, որոնք գործում են Ռուսաստանի տարբեր շրջաններում։ Շատերը չեն կորցնում խոշոր պայմանագրերի և խոշոր եկամուտների հույսը։
«Մենք փորձում ենք օգնել, հանդիպումներ ենք կազմակերպում։ Բայց շատ կարևոր է, որ մեր արտահանողներն իմանան ռուսական սուպերմարկետների կանոնները։ Այլապես նրանք ստիպված կլինեն ապրանքը վաճառել դիստրիբյուտորներին, որոնք կավելացնեն իրենց գինը։ Արդյունքում ապրանքը կթանկանա, նշանակում է՝ դժվար կլինի մրցել գնի հարցում», - բացատրեց Շաբոյանը։
Նշենք, որ 2017թ-ին մարինադների արտահանումը Հայաստանից աճել է գրեթե 40 տոկոսով, բանջարեղենային մյուս պահածոներինը՝ ավելի քան 50 տոկոսով, հյութերինը՝ 8 տոկոսով։ Դրանց իրացման հիմնական շուկան Ռուսաստանն է։
