ԵՐԵՎԱՆ, 23 նոյեմբերի — Sputnik. «ՀՀ որևէ քաղաքացի սահմանափակում չունի երթ կամ հանրահավաք իրականացնելու»։ Այս մասին այսօր Մաշտոցի պուրակում լրագրողների հետ զրույցում ասաց ՀՀ վարչապետի պաշտոնակատար Նիկոլ Փաշինյանը` պատասխանելով լիազորությունները չարաշահելու և նախընտրական քարոզչությունը սահմանված ժամանակից շուտ սկսելու մասին հարցին։
Լրագրողների դիտարկմանը, թե Հանրապետականը իրեն մեղադրում է միջազգային չափորոշիչները խախտելու և պաշտոնական լիազորությունները չարաշահելով աշխատանքային ժամերին քարոզչություն իրականացնելու մեջ, Փաշինյանը խորհուրդ տվեց այդ միջազգային չափորոշիչները կայքերում հրապարակել ։
«Այսինքն` ՀՀ վարչապետը պետք է աշխատասենյակից դուրս չգա։ Առաջադրանք համայն աշխարհի իրավաբաններին, հատկապես` հանրապետական, որևէ երկրի վարչապետ սահմանափակվա՞ծ է որևէ օր երթ անելու։ Էդ իրանց Հայաստանում էր ըտենց, հիմա այդպես չէ»,–ասաց վարչապետի պաշտոնակատարը և ընդգծեց, որ քարոզչության համար նախատեսված ժամկետից դուրս մարդիկ սահմանափակված չեն որևէ քարոզչություն անելու։
«Ես միշտ շփվել եմ ժողովրդի հետ, շփվում եմ և շփվելու եմ, իսկ երթն ունի քայլելու բնույթ։ Ես իմ նախընտրական քարոզչությունը սկսել եմ 2007 թ.–ից, և այն չի ավարտվելու, քանի ես զբաղվում եմ քաղաքականությամբ»,–ասաց Փաշինյանն ու հավելեց, որ ինքը քարոզարշավի ընթացքում արձակուրդ չի գնալու։
Ապա վարչապետի պաշտոնակատարը խորհուրդ տվեց հանրությանը դեկտեմբերի 9–ին կայանալիք արտահերթ խորհրդարանական ընտրություններում քվեարկել «Իմ քայլը» դաշինքի օգտին և դառնալով լրագրողներին ասաց` հիմա ՀՀԿ–ն էլի կասի, թե վարչական լծա՞կ եմ կիրառում։
Պատասխանելով լրագրողների`ինչո՞ւ է Հանրապետականն իր քարոզչությունը որոշել միայն մամուլի միջոցով իրականացնել հարցին, Փաշինյանը նախ զարմանք արտահայտեց, ապա ասաց. «Հանրապետական կուսակցությունը 20 տարի այնքան բան է արել, որ հնարավոր է, որ չկարողանա փողոցով քայլել, բայց ՀՀ- ում բոլորի անվտանգությունն ապահովված է։
