ԵՐԵՎԱՆ, 23 նոյեմբերի – Sputnik. «GALLUP International association»-ը hարցում է անցկացրել Հայաստանում և պարզել, որ հարցման մասնակիցների 2.9%-ը տեղյակ չէ, որ դեկտեմբերի 9-ին ԱԺ արտահերթ ընտրություն է լինելու։ Այսօր` նոյեմբերի 23-ին, հրավիրված ասուլիսի ժամանակ այս մասին ասաց «GALLUP International association»-ի Հայաստանում լիիրավ անդամ Էմ Փի Ջի ՍՊԸ-ի տնօրեն Արամ Նավասարդյանը` նշելով, որ իրենք են նախաձեռնել հարցումը, որևէ պատվիրատու չի եղել։
«Հարցումների մասնակիցներին խնդրել ենք պատասխանել հարցին` տեղյա՞կ են արդյոք, որ այս տարի ՀՀ-ում տեղի է ունենալու ԱԺ արտահերթ ընտրություն: Հարցվածների 97.1%-ը նշել է` այո, 2.9%-ը` ոչ: Նրանց, ովքեր ասել են «այո», խնդրել ենք նշել նաև ընտրությունների անցկացման ամսաթիվը: 71.4%-ը նշել է ճիշտ ամսաթիվը, 28.6%-ը դժվարացել կամ սխալ է պատասխանել»,- ասաց Նավասարդյանը:
Հարցումների մասնակիցներին հարցրել են նաև` խորհրդարանական ընտրություններին համամասնական ընտրակարգով ո՞ր կուսակցությանը կամ կուսակցությունների դաշինքին եք պատրաստվում տալ ձեր ձայնը։
Մասնակիցների 68.3%-ն ասել է` «Իմ քայլը» կուսակցությունների դաշինքին, 6.7%-ը` ԲՀԿ–ին, 1.5%-ը` ՀՀԿ–ին, 1.2%-ը` «Լուսավոր Հայաստանին», 1%-ը` ՀՅԴ–ին, 0.9%-ը` «Սասնա ծռեր» կուսակցությանը, 0,3%-ը` Քրիստոնեա-Դեմոկրատական Վերածնունդ կուսակցությանը, 0,3%-ը` «Մենք» կուսակցությունների դաշինքին, 0.2%-ը` «Քաղաքացու որոշում» սոցիալ-դեմոկրատներին, 0.1%-ը` ՕԵԿ–ին, 0%-ը` «Ազգային առաջընթաց» կուսակցությանը։
Հետազոտության ընթացքում փորձել են պարզել նաև` մարդկանց հետաքրքրում է քաղաքականությունը, թե ոչ։
«Հարցման մասնակիցների 19.9%-ը նշել է, որ շատ է հետաքրքրված քաղաքականությամբ, 42.6%-ը` ավելի շուտ հետաքրքրված է, 19.5%-ը` ավելի շուտ հետաքրքրված չէ, իսկ 17.6%-ը` ընդհանրապես հետաքրքրված չէ»,- ասաց Նավասարդյանը:
Հետազոտությունն իրականացվել է դեմ առ դեմ հարցումների մեթոդով: Հարցումների քանակը` 1111, հետազոտության ընտրանքային սխալը՝ 3%: Հետազոտության իրականացման ժամանակահատվածը՝ նոյեմբերի 17-21: Իրականացման վայրը` Հայաստանի Հանրապետություն:
Հայաստանում ԱԺ արտահերթ ընտրությունը կայանալու է 2018թ. դեկտեմբերի 9-ին: Քարոզչության ժամանակահատվածը նոյեմբերի 26-ից դեկտեմբերի 7-ն է։
