ԵՐԵՎԱՆ, 22 նոյեմբերի – Sputnik. Կառավարության անդամների մոտ ավելի լավ ստացվում է քայլելն ու միտինգներ անելը, քան տնտեսությունը զարգացնելն ու աշխատատեղեր ստեղծելը։ Այսօր ԱԺ-ում լրագրողների հետ զրույցում, անդրադառնալով ՀՀ վարչապետի պաշտոնակատար Նիկոլ Փաշինյանի հայտարարած առաջիկա քայլերթին, ասաց ԱԺ փոխնախագահ, ՀՀԿ խոսնակ Էդուարդ Շարմազանովը։
«Ում մոտ ինչ լավ ստացվում է, նա պետք է դրանով զբաղվի։ Հավանաբար պարոն վարչապետն էլ հասկացավ, որ իր մոտ տնտեսություն զարգացնելը, երկիր կառավարելը վատ է ստացվում կամ ընդհանրապես չի ստացվում, ու որոշեց զբաղվել իր հարազատ գործով՝ քայլերթեր կազմակերպելով»,- ասաց նա։
Հարցին, թե ինչն է ՀՀԿ-ի մոտ լավ ստացվում, Շարմազանովը չպատասխանեց՝ ասելով, որ պատասխանը կտա ժամանակը։
Հիշեցնենք` երեկ Նիկոլ Փաշինյանը հայտարարեց, որ նոյեմբերի 24-ին մեծ երթ է անցկացնելու։
