ԵՐԵՎԱՆ, 14 նոյեմբերի - Sputnik. Հոկտեմբերի մեկին մահացած աշխարհահռչակ շանսոնյե Շառլ Ազնավուրի որդին ասել է, որ հնարավոր է հոր հիշատակին նվիրված երաժշտական հավաքածու թողարկվի։
«Universal ստուդիայի հետ մի քանի երգերի վերաթողարկման նախագիծ կա։ Նա (Ազնավուրը) 2016 թվականի սկավառակի ձայնագրման ժամանակ 5–6 թրեք է ձայնագրել։ Դրանից բացի, մի քանի ձայնագրություն արդեն պատրաստ էին, մոնտաժված, գործիքավորումն արված էր, սակայն ձայնը դեռ չէր դրվել», – ասել է երգչի որդին` Միշա Ազնավուրը RTL ռադիոընկերության հետ հարցազրույցում։
«Հնարավոր է, հաջողվի ստեղծել հավաքածու, որը կներառի հորս կատարմամբ վեց երգ, որոնց կատարումները նա կարող էր վստահել մարդկանց, որոնց շատ էր գնահատում», – ասել է հայտնի շանսոնյեի որդին։
Սակայն, նրա խոսքով, տվյալ պահին բոլոր երգերի կատարումների թեկնածուները չեն որ կան։
Ազնավուրի որդին նշել է, որ այլ նախագծեր էլ են պատրաստվում։ Նախատեսվում է մեծ էկրանով ցուցադրել երգչի նկարահանած կադրերով ֆիլմը։ Բացի այդ, կարող են մի շարք անիմացիոն տեսահոլովակներ նկարահանվել, որոնք հիմնված կլինեն մեծն շանսոնյեի սիրո մասին երգերի վրա։
Նշանավոր ֆրանսահայ շանսոնյե, երգիչ, երգահան, կինոդերասան և հասարակական գործիչ Շառլ Ազնավուրը (իսկական անունը` Շահնուր Վաղինակ Ազնավուրյան) ծնվել է 1924թ.-ի մայիսի 22-ին Փարիզում, հայ գաղթականներ Միքայել և Քնար Ազնավուրյանների ընտանիքում: Մանուկ հասակում տարվել է թատրոնով, իսկ 1940-ական թթ. Պիեռ Ռոշի հետ հանդես է եկել կաբարեում։
Համաշխարհային հռչակ է ձեռք բերել 1956թ.-ին Փարիզի դահլիճներից մեկում հաջող ելույթից հետո։ Նրա գրած երգերը կատարել են Էդիտ Պիաֆը, Լայզա Մինելին, Մստիսլավ Ռոստրոպովիչը, Հուլիո Իգլեսիասը, Շերը, Ջո Դասենը, Ռեյ Չարլզը և այլք։
Շառլ Ազնավուրը միջազգային ասպարեզում ռեկորդային թվով ձայնասկավառակ է վաճառել (180 մլն)։
