ԵՐԵՎԱՆ, 14 նոյեմբերի — Sputnik. Հյուսիս–հարավ ավտոճանապարհի շինարարությունը սկսվել է ամենադյուրին հատվածներից` Արտաշատից, Արարատից, ոչ թե լեռնային հատվածներից։ այսօր` նոյեմբերի 14-ին, Ազգային ժողովում ներկայացնելով 2019թ–ի բյուջեի նախագծի ոլորտային հատվածը` այս մասին ասաց ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը։ Նրա խոսքով` նախարարությունում այսօր էլ փորձում են հասկանալ, թե ինչու են հատկապես հենց այդ ամենադյուրին հատվածների վրա հսկայական գումարներ ծախսվել, շատ դեպքերում` անարդյունք։
«Այդ պատճառով մենք հիմա ունենք հստակ դիրքորոշում, որ Սիսիան– Քաջարան հատվածում տեղաբաշխենք հետագա ներդրումային պլաններն այնպես, որ այդ հատվածներում միայն մեկ թունելի ու երկու կամրջի շինարարությամբ կարողանանք շուրջ 50 կմ–ով կրճատել Սիսիան–Քաջարան ավտոճանապարհը»,– ասաց նախարարի պաշտոնակատարը։
Հաջորդ տարի, նրա խոսքով, կիրականացվի նաև Վանաձոր–Ալավերդի– Վրաստանի սահման ճանապարհահատվածի շինարարությունը։
Արշակյանը նշեց նաև, որ այս տարի 25 համայնքների հետ կապվող ճանապարհներ են նորոգվել, որով այդ գյուղերն ու քաղաքները հնարավորություն են ստացել բարձրակարգ ճանապարհներով կապվելու միջպետական ու միջհամայնքային ավտոճանապարհներին։
Նախարարի պաշտոնակատարի խոսքով` հաջորդ տարի նախատեսվում է նման հնարավորություն տալ ևս 35 համայնքի։
«Հյուսիս-հարավ» տրանսպորտային միջանցքը ռազմավարական նշանակություն ունի Հայաստանի համար։ 550 կմ երկարություն ունեցող այդ ճանապարհը թույլ կտա դուրս գալ դեպի Սև ծով և եվրոպական երկրներ՝ կապ ապահովելով Իրանի և Վրաստանի հետ:
Հայաստանը դեռևս 2009 թվականին վարկային համաձայնագիր է ստորագրել Ասիական զարգացման բանկի հետ։ Համաձայնագրով նախատեսվում էր մայրուղու շինարարությունն ավարտել 2016 թվականին, սակայն շինարարական աշխատանքները սկսեցին բանկի հետ պայմանագիրը կնքելուց միան երեք տարի անց։
