ԵՐԵՎԱՆ, 13 նոյեմբերի — Sputnik. Մինսկի խմբի համանախագահները Հայաստանի և Ադրբեջանի արտգործնախարարներին առաջարկել են հանդիպել Միլանում, սակայն վերջանական որոշում դեռ չկա։ Այսօր ճեպազրույցի ընթացքում այս մասին ասաց ՀՀ արտաքին գործերի նախարարության մամուլի խոսնակ Աննա Նաղդալյանը։
Նրա խոսքով` ավելի վաղ համանախագահներն առաջարկել էին կազմակերպել Հայաստանի և Ադրբեջանի ԱԳՆ ղեկավարների հանդիպումը մինչև տարեվերջ` Միլանում կայանալիք ԵԱՀԿ նախարարական գագաթնաժողովին։
«Երբ հանդիպման հարցը պարզվի, հանրությունն այդ մասին կտեղեկացվի», – ասաց Նաղդալյանը։
Միլանում դեկտեմբերի 6-7-ը կկայանա ԵԱՀԿ արտգործնախարարների խորհրդի նիստը։ ՀՀ արտգործնախարարի պաշտոնակատար Զոհրաբ Մնացականյանը կմասնակցի այդ նիստին։
