Հայաստանցի Սոնա Դունոյանը թեև չկարողացավ հաղթահարել «Կույր լսումների» փուլը, բայց «Գութան» երգի կատարմամբ ոգևորեց «Ձայնը» շոուի ժյուրիի անդամներին։
Մրցույթին մասնակցելու համար Սոնան ընտրել էր Էնն Մարիի «Ciao Adios» երգը, բայց նրա կատարումը երևի չտպավորեց ժյուրիի անդամներին, որովհետև նրանցից ոչ մեկը չշրջվեց, թեև ավելի ուշ բոլորն էլ ասացին, որ հայուհին տաղանդավոր է։ Կոմպոզիտոր Կոնստանտին Մելաձեն խոստովանեց, որ Սոնան կարող էր հաղթել, եթե Շակիրայի նմանակների մրցույթ լիներ։
«Այնպիսի տպավորություն է, որ դիմակով եք եկել, իսկ մենք պետք է ձեր դեմքը տեսնենք», - ասաց նա։
Անի Լորակն առաջարկեց մեկ այլ բան երգել, ու Սոնան երգեց «Գութան» ստեղծագործությունը։ Ժյուրիի չորս անդամներն էլ շնորհակալություն հայտնեցին գեղեցիկ կատարման համար։
Համացանցում հրապարակված տեսանյութի տակ օգտատերերից շատերը զայրացած մեկնաբանություններ են գրել․ «Նախագծի պատմության ընթացքում ամենավատ մարզիչներն են», «Այլանդակություն է, նրանք խուլ են», «Կարծում եմ՝ առաջին հայն է, որ չանցավ կույր լսումները»։
