Դեռ չգիտեն. ինչո՞ւ ՀՀԿ–ն ոչ մի կերպ չի կողմնորոշվում ընտրությունների հարցում

ԵՐԵՎԱՆ, 7 նոյեմբերի — Sputnik, Աշոտ Սաֆարյան. Հայաստանի Հանրապետական կուսակցությունը դեռ չի կողմնորոշվել արտահերթ խորհրդարանական ընտրություններում իր մասնակցության հարցում։ Դատելով ստացված ինսայդերական տեղեկությունից` կուսակցությունում ակտիվ բանավեճեր են ընթանում այդ թեմայի շուրջ։ Ի սկզբանե նշվել է, որ այս շաբաթվա վերջին պետք է ունենա կուսակցության համագումարը, այդ մասին ասել է ՀՀԿ փոխնախագահ Արմեն Աշոտյանը։

Այժմ մամուլում հրապարակումներ են հայտնվել այն մասին, որ հանրապետականները կարող են հրաժարվել համագումար անցկացնելու գաղափարից։ Այդ մասին գրում է «Ժամանակ» թերթը։ Պարբերականը նշում է, որ այն հանրապետականները, որոնք նախկինում ակտիվորեն ելույթ են ունեցել ընտրություններին մասնակցելու օգտին, հիմա նահանջում են իրենց դիրքերից` հասկանալով, որ իրենց շանսերը չնչին են, և «խայտառակությունից խուսափելու լավագույն միջոցը չմասնակցելն է»։

Միաժամանակ հայտնի հանրապետականներից մեկը` պաշտպանության նախկին նախարար Վիգեն Սարգսյանը, կարծում է, որ ՀՀԿ–ն պետք է մասնակցի ընտրություններին։ Նա ենթադրում է, որ չի կարելի հեռանալ քաղաքական կյանքից` ունենալով կառավարման հարուստ փորձ և պրոֆեսիոնալների թիմ։ Նրա հետ համակարծիք է խորհրդարանի խոսնակ Արա Բաբլոյանը։

Կուսակցության պաշտոնական դիրքորոշման բացակայությունը մի կողմից և առանձին անդամների արտահայտությունները մյուս կողմից վկայում են խառնաշփոթի և  տարաձայնությունների մասին, որոնք հիմա իշխում են ՀՀԿ ներսում, որի դիրքերը դեռ մի քանի ամիս առաջ անսասան էին թվում։

ՀՀԿ–ի համար իսկապես դժվար ժամանակներ էին։ Ընտրությունների նախօրեին իրավիճակը խորանում է նաև նրանով, որ «կուսակցության շարքերից խոշոր գործարարների փախուստը թույլ չի տալիս լուրջ հաջողություն ունենալ ընտրությունների վարկանիշային համակարգով։

Վարկանիշային թեկնածուները` առավելապես «հաստաքսակները», անցած տարի խորհրդարանական ընտրություններում խլացուցիչ հաջողություն են ապահովել խորհրդարանական ընտրություններում։

Բայց վարկանիշային համակարգի առաջնորդներից մեկը` Կարեն Կարապետյանը (ռուսաստանցի միլիարդատեր Սամվել Կարապետյանի եղբայրը), նախօրեին հայտարարել է, որ չի մասնակցելու ընտրություններին։ Չէ որ նա անցած տարի ՀՀԿ–ին բերել է ավելի քան 40 հազար ձայն։ Եվս մի «առաջնորդ»` խոշոր գործարար Սամվել Ալեքսանյանը, որն անցած տարի վարկանիշային համակարգով հավաքել է ավելի քան 40 հազար ձայն, առայժմ չի հայտարարել ընտրություններին մասնակցելու մասին։ Մեծ հավանականությամբ կարելի է պնդել, որ նա խոչընդոտներ չի ստեղծի Նիկոլ Փաշինյանի համար։ Այսինքն ՀՀԿ–ն չի կարող հույս դնել նրա վրա։

Այդ պայմաններում ՀՀԿ–ին կարող է մի քիչ «փրկել» Նիկոլ Փաշինյանի թիմի վարկանիշի անկումը։ Սակայն ընտրությունները տեղի կունենան մեկ ամիս անց, և այդ ընթացքում հարկ չի լինի ակնկալել լուրջ բացթողումներ, որպեսզի հանրապետականները կարողանան միավորներ վաստակել։

Միաժամանակ հանրապետականներն իրեն ավանդական ընտրական բազան ունեն ի դեմս բյուջետային հաստատությունների նախկին և, հնարավոր է, գործող աշխատակիցների։

Դժվար է դատել, թե ընտրողների քանի տոկոսն է կազմում այդ շերտը, բայց, դատելով հասարակությունում առկա տրամադրություններից, շատերը կարիերայի աճ ունենալուց, ՀՀԿ–ի օրոք «մարդ դառնալուց» հետո հիմա նեղացած են նոր իշխանությունից։ Նրանք կորցրել են աշխատանքը, մյուսներն իրենց պարտավորված են զգում ՀՀԿ–ի առաջ և մտադիր են քվեարկել նրա օգտին։ Բացառված չէ, որ հանրապետականները կփորձեն գրավել հասարակության այդ հատվածը` խորհրդարան անցնելու համար թեկուզ նվազագույն շեմ ապահովելու համար։

Հանրապետականները կանգնած են բավական բարդ ընտրության առաջ։ Եթե կուսակցությունը չմտնի խորհրդարան, իսկ նման հավանականություն կա, ապա այն երկար ժամանակ քաղաքական գործընթացներից դուրս կմնա։ Այդ առումով մասնակցությունից հրաժարվելն ապագայում կհանգեցնի կուսակցության նկատմամբ հասարակական հետաքրքրության աճի։ Հիշենք առաջին նախագահ Լևոն Տեր–Պետրոսյանին, որը հրաժարականից և 10 տարվա լռությունից հետո հայտնվեց ասպարեզում` իր շուրջ համախմբելով գործող իշխանությունից դժգոհ տասնյակ հազարավոր քաղաքացիների։ Շուտով հայտնի կդառնա, թե որ տարբերակին նախապատվություն կտան կուսակցությունում։