ԵՐԵՎԱՆ, 7 նոյեմբերի – Sputnik. Արարատի մարզպետ Գարիկ Սարգսյանն ԱԺ առաջիկա ընտրությանն առաջադրվելու է ռեյտինգային ընտրակարգով Արարատի մարզում: Այսօր Ազգային ժողովում նա այս մասին հայտնեց լրագրողներին:
«Փորձելու ենք ամեն ինչ անել, որ ընտրություններն անցնեն հանգիստ, ժողովուրդը կատարի իր կամարտահայտությունը»,- ասաց մարզպետը:
Մարզում ՀՀԿ-ի ներկայության ու հնարավոր խախտումների մասին հարցին մարզպետն այսպես պատասխանեց. «Եղել են մարդիկ, որ եղել են Հանրապետական կուսակցության հետ, այսօր ինչ-ինչ հանգամանքներում թողնում են, լքում են այդ կուսակցությունը: Բոլորն էլ մեր բնակիչներն են, թող շնչեն, թող ապրեն նոր Հայաստանում»:
Իսկ Արարատի մարզում բարձր հեղինակություն և վարկանիշ ունեցող անձանց ներկայությանն ու վերջին շրջանում իր հետ կապված դժգոհությունների վերաբերյալ հիշեցմանը Գարիկ Սարգսյանը խորհուրդ տվեց սպասել ընտրությունների արդյունքներին:
«Ընտրությունները ցույց կտան, թե ով որքան վարկանիշ ունի: Եթե անցած տարի ընտրություններն անցել են համատարած կաշառքի, վախի, ռեսուրսների կիրառման պայմաններում, և մարդիկ եթե կփորձեն այս իրողություններում փորձել իրենց ուժերը, թող ապացուցեն՝ այս իրողություններում ունե՞ն այդ ռեյտինգը, թե՞ դա ուղղակի փուչիկ էր»,- ասաց նա:
Հիշեցնենք` ԱԺ արտահերթ ընտրությունը Հայաստանում կանցկացվի դեկտեմբերի 9-ին:
